Tourism Minister leh kohhran hruaitute'n Mizorama khualzin chungchang an sawiho

Tourism minister Lalnghinglova Hmar leh Council of Churches in Mizoram (CCM) aiawhte chu nimin khan Secretariat conference hall-ah an inkâwm a; tun hnaia Mizorama khualzin pung nasa chungchang an sawiho.

Minister Lalhinglova Hmar chuan, tun hnaiah Mizoramah khualzin an pun nasat thu sawiin, "September thlaah Sairang thleng rêl a lo lut a, a thla leh October thlaah Mizoram a khualzin lo lut zat chu mi 90,000 an tling. Mizoram tlawhtu ṭhahnem tak kan nei a, an la pun belh zel kan beisei a, chumi tur chuan Tourism department-in hma kan la a ni," a ti.

Mizorama khualzin pung nasa chuan nghawng a nei lo thei lo tih sawiin Lalnghinglova chuan, "Khualzinte hian kan ram mawina leh nawmna te hmuha hriat ve an duh a, an rawn pun tak zelah chuan engtin nge kan lo dawnsawn ang tih ngaihtuah a ngai ta a ni," a ti a; Mizorama kohhran hrang hrang hruaitute nena inkawm a ngaih chhan a sawi.

Tourism Minister chuan, khualzinte chu Mizo nunphung leh khawsak dan hre saa rawn lut an nih vek loh thu sawiin, "December thla chhungin district pathum belh tel lovin khualzin mi nuai 1,10,000 chuang kan nei. Tourism hian mi zawng zawng a nghawng avangin kohhran leh khawtlang hruaitu te, tlawmngai pawlte nen thawhhona ṭha tak nei a lo dawnsawn a ngai a ni," a ti.

Lalnghinglova Hmar chuan, khualzin dawnsawn dan tur mipuite'n an hriatthiam a pawimawh tih sawiin, "Biak-in hi khualzinte tlawh châk zingah a tel a, biak-in chhunga awm dan tur leh inthuam dan tur thlenga mikhual lamin an hriat theihna tura hmalak dan leh, eng chinah nge an lo tel ang tihte sawiho a pawimawh a ni," a ti a; CCM nena hmalakho dan turte ngaihtuah a ṭul thu a sawi.

CCM hruaitute chuan, Mizorama khualzin pung chu lawmawm an ti a, kohhran pawh a nghawng tel thu te, kohhran anga ngaihtuahna sên a, hmalak ṭul an tih thu an sawi a ni.

Hun remchang hmasaah thawhho dan tur ngaihtuah leh hmalakna awm thei tur hrang hrangte uluk zawka thlirho leh ni se, an ti a; CCM-in hmalak dan tura an duh dante lo ngaihtuah lawk se, an ti bawk.

Sawihonaah hian Tourism department hotute pawh an tel a ni.