CAB-ah demand pahnih ka nei dawn - Ronald Sapa

Mizoram aiawha Rajya Sabha MP Ronald Sapa Tlau chuan, Citizenship Amendment Bill (CAB), vawiina Rajya Sabha-a pharh tur chungchangah demand (phût) pahnih a neih dawn thu a sawi.

Ronald Sapa Tlau chuan nimin khan Parliament kawtah CAB chungchang sawiin, CAB chu kum 2016-ah pawh Lok Sabha-ah pass a nih tawh thu a sawi a, "Theihtawp chhuaha Mizoram mipuiin kawngzawh leh ṭawng-

ṭaina nena kan beih hnuin Pathian ṭanpuinain a thlawn ta a ni. Tunah pawh BJP chuan an sawi angin an rawn thar thawh leh ta," a ti.

Mizoram MP chuan, MZP, Mizoram Synod leh tlawmngai pawl hrang hrangin CAB chu Mizote leh Kristiante tana ṭha lo leh rilru tina zawnga a kal hlaua hma an lak mek thu a hriat avangin a thlamuan thu a sawi. Rajya Sabha lamah theihtawp a chhuah tur thu sawiin Ronald Sapa chuan,"Congress party kaihhruaina chu regional party 12-te'n min thlàwp an tum. Dinhmun ṭanna tur chi hnih a awm a, CAB pass duh leh duh lo a ni, tuiláirapin a awm theih loh. Mizoram sorkar, MNF pawhin Central-a tlaktlum an tum vang nge, NEDA aṭanga an thawhpui BJP an vote ta a ni," a ti.

Ronald Sapa Tlau chuan, mithiamte chhût danin, India hmarchhak mipui 70% velin CAB an dodal tih sawiin, "ILP hmang state leh tribal area a huam dawn loh vanga a duh zawnga vote thlak chu thil awm thei a ni. Mahse, keini chhût danah chuan, thil ngaihngamawm loh tak a ni. CAB hi Esopa thawnthua chinghne beram vun sin anga Hindutva leh Hindustan tihzauh tumna niin kan ngai," a ti a; ILP leh CAB inkungkaih dan hriat chian a ngaih thu a sawi.

Rajya Sabha-a sawiho a nih hunah an hotute remtih angin demand a neih dawn thu sawiin Ronald Sapa chuan, "CAB-ah hian tribal nih ve avanga tribal area emaw, ILP hmanna state emawa inbenbel phal lohna dan a awm miah loh avangin kan ngaih a ngam lo. Tribal pawh ni se, an inbengbel thiang lo ang tih belhtir kan tum. Keima'n ka demand dawn a, hei bakah cut off year December 31, 2014 bak chu hawn belh a nih lohna tur provision siam belhtir ka tum,'' a ti. 

Mithiamte chhût danin, Rajya Sabha-ah chuan CAB duh leh duh loh chu 50:50 a nih thu sawiin Rajya Sabha MP chuan, "Hneh lo thei dinhmunah kan ding. Pathian nung ring kan nih vangin a kutah engkim a awm," a ti a; theihtawpa ṭawngṭainaa pui turin Mizoram mipui a sáwm a ni.