Home department hotute inhmukhawm

Home minister K Sapdanga hoin nimin khan Planning conference hall-ah Home department hotute leh a hnuaia peng hrang hrang hotute an ṭhukhawm a; an hnathawh leh hmasawn dante thlir lêt bakah, hmathlirte an sawiho.

Home Minister chuan, Home department leh a chhunga department hrang hrangte'n mawhphurhna inṭâwm an neih chu - mipui ralmuanna tura dan leh thupek kenkawh te, ramri venhim leh state pawn aṭanga lo lutte mumal taka lo kaihhruaite a nih thu a sawi a, "Home department hi state sorkar ngaihah pawh department pawimawh zual bik zinga mi, mawhphurhna sang bik leh office pawn lama hna ngah zawk kan ni," a ti.

Home department chu harsatna tâwk apiangte zualkona an nih thu sawiin K Sapdanga chuan, "Home department hnate tlin taka thawk tur chuan hna lâk aṭanga uluk a ngai," a ti a, ram tana nasa lehzuala thawk zel turin Home hnuaia officer-te a fuih.

Ṭhutkhawmah hian Home depart-ment, Mizoram Police, Fire & Emergency Services, Prison, Mizoram Home Guard and Civil Defence, Sainic Welfare & Resettlement leh Forensic Science Laboratory hotute an tel a; kum kal taa an hnathawh thlir letna hun hman a ni a, an hmachhawpte ngaihthlak a ni bawk.