Chapchar Kût kar khat hman a ni dawn

Chapchar Kût 2026 Organising Committee chu nimin khan chief minister Lalduhoma kaihhruaiin CMO conference hall-ah an ṭhu a, kumina Chapchar Kûta hun hman dan tur (programme) kimchang an duang. Kût hi chawlhkar khat chhung hman turin an ruahman.

Kumin Chapchar Kût aṭangin Chief Minister 'Chawimawina Nopui' hlan a ni dawn a; nopui dawng tlaka ngaih rawtna hrang hrang lut zing aṭangin a ṭum khatnaa dawngtu turte chu nimina ṭhutkhawmah thlan a ni. Nopui hian Rs 1,00,000, thuchei leh hùnmawi (memento) a keng dawn. Chapchar Kût 2026 thupui atan hian 'Zo nun ze mawi - Inremna' tih thlan a ni.

CHAPCHAR KÛT 2026 HMAN DAN TUR

* March 9-ah Kût puala tlan (Kût Run) buatsaih a ni dawn a; Central YMA-in anmahni sensoin t-shirt an buaipui ang.

* March 10-ah handloom, textile & handicraft, food processing & food court hawn a ni ang a, a hmun tur tihchian a la ni lo.

* March 10-ah Aijal Club lawn-ah Flower Show ṭan a ni ang.

* March 11-ah painting exhibition, photo exhibition leh Chapchar Kût film show hawn a ni ang a, a hmun tur chu Vanapa Hall leh IPR Lianchhiri Rûn a ni ang.

* March 11-12 chhungin Zokhua, Falkawnah Living Museum buatsaih a ni ang.

* March 13-ah Lammualah Chapchar Kût tak tak hman tur a ni a, chawhma dar 10:30-ah ṭanin, darkar 6 awh tur hun ruat a ni. Chief Minister chu kût pa a ni ang a, Art & Culture Minister chu kût thlengtu a ni ang.

* Bawlhhlawh hnutchhiah lo kût hman tum a ni.