KHAWTHLIR

High Commissioner to New Zeland-ah Mizo

Muanpuii Saiawi, IFS chu New Zealand-a India high commissioner atan ruat a ni. Muanpuii Saiawi hi 2005 batch IFS niin, Ministry of External Affairs (MEA)-ah joint secretary a ni mek a; New Zeland-a High Commissioner of India atana ruat a nihna hi MEA chuan January 19, Thawhṭanni khan a chhuah a ni.

AR-in heroin man

Assam Rifles chuan January 19, Thawhṭanni khan Champhai Zote-ah K Thangzuala khalh scooty aṭangin heroin gram 49.6 an man a, Champhaia Excise and Narcotics department hnenah an hlan. AR-te hian January 17, 2026 pawh khan Champhai Zotlangah Rodingliana leh Vansanga nia insawi hnen aṭangin heroin gram 174 an man bawk.

College-ah bus pe

North Eastern Electric Power Corporation (NEEPCO) chuan corporate social responsibility aṭangin T Romana College hnenah bus thar an pe. Bus inhlanna hun hi nimin khan TRC tualah hman a ni a; principal Dr Jennifer Lalbiakdiki'n a dawng. Bus hi cheng nuai 23 man a ni.

Inhlan thar

Sericulture department hnuaia thawkte chuan nimin khan an conference hall-ah inhlan tharna hun an hmang a, Sericulture minister Lalthansanga'n a hmanpui. Minister chuan, Mizoram chu Pathian ram a nih thu sawiin, "Kan department hi ram siamṭha thei khawp department kan nih avangin Pathian rawngbawlna anga ngaia theihtawp kan chhuah tlan a ngai," a ti.

Larsapin kâwm

Larsap Gen. Vijay Kumar Singh chuan nimin khan Ashtalakshmi Darshan Youth Exchange Programme kaltlanga Mizoram rawn tlawhtu Andaman and Nicobar Islands leh Lakshadweep aṭanga zirlai 40 leh zirtirtu palite Lok Bhavan Durbar Hall-ah a kâwm. Larsap hian Mizoram rawn tlawhtu zirlaite chu thinlung taka a lo lawm thu hrilhin, India hmarchhak state-te hriat chian lehzual nan hmanh turin a chah.