Minister-in training khârna a hmanpui

Disaster Management & Rehabilitation (DMR) department leh 1 Mizo Bn National Cadet Corp (NCC) ten January 13, 2026 aṭanga 5th Batch Training of Yuva Aapda Mitra an buatsaih chu Mizoram Scouts & Guides Training Center, Tanhrilah nimin khan khâr a ni a, khârna hun hi DMR minister Prof. Lalnilawma'n a hmanpui.

Prof. Lalnilawma chuan, khuarel chhiatna laka invenna leh chêt lak dan chungchangah DMR department leh 1 Mizo NCC Aizawl te ṭha taka an thawk ho thei chu a lawm thu a sawi a, "Hun lo la kal leh zel turah thawhhona ṭha neih a pawimawh. Khuarel chhiatna hi kan duh vang a thleng a ni lo a, kan thuneihna piah lam a nih angin chhiatna tawng thei vek kan ni. Khuarel chhiatna a lo thlen hun atana lo inbuatsaih lawk hi kan tih ve theih a ni," a ti.

Yuva Aapda Mitra Training batch 5-naah hian college pakua - Mamit College, Kolasib College, Serchhip College, Lunglei College, Khawzawl College, Kamalanagar College, Siaha College, HATIM leh JB College aṭanga NCC cadet 112-te'n training an zo a ni.

Yuva Aapda Mitra Scheme-in a tum ber chu, khawtlangah chhiatna a thlen a, hmun dang aṭanga chhanchhuaktute an thlen hmaa khawtlang mite'n chhanchhuah hna an thawh theih nana ṭhalaite buatsaih a ni a; Lunglei, Champhai, Kolasib, Serchhip leh Mamit district tan training kalpui mek zel a ni.

Nimina training chhuakte nen hian ṭhalai rual, NCC, NYKS, Bharat Scout & Guides leh NSS mi 531-te'n training an zo tawh a ni.