Christ University-ah Rinpuii khuallian a ni

Minister Lalrinpuii chu nimin khan Christ University-in 'Libernum 2026 - International Conference on Northeast India at the Crossroad: Inclusion, culture and a sustainable future' tih an buatsaihah khuallian a ni a; India hmarchhak bial chu 'landlocked' ni tawh loin, 'land-linked' a nih tawh thu sawi.

Lalrinpuii chuan, "Agartala-Akhaura rail kawng te, Kaladan Multi Modal Transit Transport leh Asian highway te avangin kawng engkimah hmarchhak bialah inkalpawhna a ṭha tawh a ni. North east hi landlocked tia sawi tawh loin, 'land-linked' tiin i sawi tawh zawk ang u," a ti.

Hnam nunphung leh chin dante chu museum-a dahṭhat mai mai tur a ni lo tih sawiin Lalrinpuii chuan, "Khawvel economy inelna sang takah hian intellectual property hlu tak a ni tawh zawk. Kan puancheite leh kan ram hnim damdawite hi khawvel mamawh, a hlutna sang tak a ni tawh," a ti a; hmasawnna leh hriselna chu damdawi-in tam lam ringawt ni loin, mahni rama awm a, eizawnna ngêlnghet neih theih a nih thu a sawi.

Minister Lalrinpuii chuan, technology ṭhang zelah Mizoram kilkhâwr taka cheng zirlaite leh Bengaluru-a awmte'n thiamna leh hriatna inang an dawng thei tawh tih sawiin, "Hei hi inclusive governance dik tak chu a ni," a ti a; hmarchhak bial chu India ram tana boruak thianghlim petu a nih avangin, hmasawnna kalpui dan pawh a danglam a ngaih thu a sawi bawk.

Conference-ah hian Mizo-rama artificial intelligence lama hma latu LushAITech pawh Christ University nen thawkhoin, AI Partner angin an tel a ni.