Lungleia oxygen plant hman theiha dah turin sorkar ngen

MNF Sub-Headquarters, Lunglei Vigilance department hotute chuan nimin khan Civil Hospital, Lungleia sorkar hmalak dan an enfiah a; oxygen plant hman theih loha awm mek chu hman theiha dah turin sorkar an ngen.

Lungleia MNF Vigilance department chuan thuchhuah siamin, MNF sorkar laiin Lunglei Civil Hospital-ah oxygen plant lian (800 PPM) dah a ni a, ward tina khum zawng zawng thlun zawm vek a nih thu an tarlang a, "Tun din hmunah a khawl a ṭhat loh avangin hman theih lohin a awm mek. Oxygen pek chhuahna khawl a chhiat avanga hman theih lohin a awm hi pawi kan ti a, oxygen mawhtute’n rang taka oxygen an hmuh/hîp zung zung theih nan a rang thei ang bera siam ṭha a, function-tir thuai turin sorkar kan ngen a ni," an ti.

Lunglei Civil Hospital-ah syringe pump an indaih lo hle thu te, marphu, blood pressure, respiration, temperature, SPO-II leh thil dang enna monitor function thei lo a awm nual thu te, thawktu indaih loh viau thute an tarlang bawk.