Nasa zawka hepatitis buaipui duh

The Delhi Network of Positive People (DNP+), International Treatment Preparedness Coalition leh Coalition Plus hruai-tute chuan nimin khan Hotel Floria-ah thuthar thehdarhtute an kâwm a; hepatitis chungchang nasa zawkin Mizoram sorkarin buaipui se an duh thu an sawi.

TREAT Asia, Bangkok-a manager Giten Khw­airakpam chuan, hepa­­titis hrang hrang zing-ah B leh C-te chu a hluar zual an nih thu sawiin, "Hepatitis chi hrang hrang miin an vei zingah 98% chu B leh C-te a ni. Hepatitis hi a lang chhuak har em em a, kum 20 chhungte a hriat loh theih. Hriat chhuah a nih meuh chuan thin a lo chhe tawh a, a tlai tawh thei a ni," a ti. 

Giten Khwairakpam chuan, India ramah hepatitis D kai mi nuai 400 vel leh C kai mi nuai 80 vel an awm thu sawiin, "HIV/AIDS chu kum 15 vel kal ta aṭang vel khan buaipui a ni tawh a, awareness pawh a ṭha tawh hle. Hepatitis erawh buaipui a hlawh lo a, harsatna lian tak a ni tawh," a ti a; hepatitis chu ruihhlo hmanga inchiu ṭhin zinga 88%-in an kái anga chhût a nih thu a sawi.

Giten Khwairakpam sawi danin, sorkar laipui-in July 2018 aṭangin Viral Hepatitis Control Programme a kalpui a, centre hrang hrang an siam. He programme hnuaiah hian Mizoramah pawh Aizawl Civil Hospital-ah hepatitis C test theih a nih bakah, a kaite tan inenkawl theih a ni. District dangah pawh hepatitis C endikna leh enkawlna dah zel tum a ni.

Hepatitis B chu a tih­damna a awm lo a, a venna erawh a awm. Hepatitis C chu tihdam theih a ni a, ṭha taka damdawi ei chuan chawlhkar 12 chhung velin a dam thei a ni. Hepatitis C hian mipui náwlpui a nghawng tawh a, HIV/AIDS leh hepatitis kai kawp zingah AIDS vanga thi aiin hepatitis vanga thi an tam zawk.

DNP+ programme manager Elaine Haokip chuan, tihdam theihna natna miin an thihpui ṭhin chu an vei thu sawiin, "Viral Hepatitis Control Programme hnuaiah hepatitis C kai leh kai loh a thlawna endik theih a nih bakah, inenkawlna pawh a thlawn vek tur a ni. Hetiang a nih laia miin an thihpui fo avang hian awareness neih ṭhat a, sorkarin theih-tawp a chhuah a ṭulzia a tilang," a ti.

Mizorama hepatitis buaipuitute chuan, India ram state dangah hepatitis C kai leh kai loh a thlawna endik theih a ni a, a thlawna enkawl theih a nih bawk laia Mizorama a thlawna tih theih a la ni ve lo chu mak an tih thu an sawi a, "Aizawl Civil Hospital-ah a test-na leh enkawlna a awm a, mahse, sum sên a ngai. Sorkarin hemi chungchangah hian ngaihtuahna a sên nasat a ngai a ni," an ti a; hepatitis chu ngaihthah a nih chuan chhiatpui a hlauhawm thu an sawi bawk.