Balu phurh luh phal dawn lo

Mizoram Tipper Association (MTA) district headquarters, Kolasib leh Kolasib district-a Balu Neitu Association-te December 5, 2019-a ṭhu-khawm chuan, Mizoram páwn aṭanga balu phurh luh an remti dawn lo a, hei hi vawiin aṭangin an kalpui dawn.

MTA president F Lalbiakliana chuan, phai aṭanga Mizorama balu lût tur dang turin Vairengte leh Bairabi-ah an duty dawn thu Kolasib-a thuthar thehdarhtute a hrilh a; bungraw phur lirthei dan erawh an tum loh thu leh, Mizoramin a intodelh ve reng balu chauh Mizoram a phurh luh an remtih loh thu a sawi. 

MTA President chuan, MTA Dist. Hqrs., Ko­la­sib leh Kolasib District Balu Neitu Association-te chu nimin chawhma dar 11 khan Kolasib DC-in a koh thu a sawi a, "Road block leh mipui harsatna siam tum kan nih loh avangin Kolasib DC-in min koh khawmna chhan hi kan hre lo," a ti.