Mitdelte'n inkhawmpui an hmang

Mizoram Blind Society (MBS) chuan December 9, Thawhṭanni khan White Stone conference hall-ah inkhawmpui an hmang a, dan leh hrai inzirtirna hun an hmang nghal.

Inkhawmpuiah hian chawhma lamah ro an rél a, chawhnu lamah MBS president K Lalhmingsanga kaihhruaina hnuaiah pianphunga rualbanlote dikna chanvo leh hamṭhatna chungchanga dan leh hrai awmte zirho a ni.

    MBS thurel Ṭhenkhat : 

q    Rights of Persons With Disabilities Act, 2016-in din tura a tih, Mizoram sorkar hnuaia pianphunga rualbanlote hmakhua ngaihtuah tura committee din tawh - Mizoram State Advisory Board For Persons With Disabilities, Special Committee on Identification of Post for Persons with Disabilities, Mizoram State Committee On Disability Research leh district hrang hranga District Disability Rehabilitation Committee-te hian tun aia chak zawkin Mizorama pianphunga rualbanlote hmasawnna turin a tak takin hma la se. He thilah hian MBS chu Mizoram sorkar hmalakna tichak tur leh thuràwn pea finchhuahtu ni turin theihtawpin ke a pên zel dawn a ni.

q    MBS member zinga mi ṭhenkhat, enkawltu mumal nei tawh lote leh eizawnna mumal la nei ve lote'n leirem rapa eizawnna pangngai an neih ve theihna tura hmalak a, RPWD Act, 2016 Chapter 7 hnuaia Special Provision for Persons with Disabilities with High Support Need tlawhchhana dan mumal leh rintlak tak siam tura Mizoram sorkar nawr leh finchhuah.

q    Department hrang hranga hna ruakah pianphunga rualbanlote quota recruit a nih reng rengin mitdelte (totally  blind)-te chu hnâwl leh duhsakna pek an ni ngai lo a, mit khawhmuh fiah lo (low vision), en maia mit ṭha lo an nih pawh hriat miah loa mahni duh duha engkim la ti thei vek leh rualbanlote quota hmanga hna lak a nih dawn vang chauha disability certificate siamtir ṭhinte chu duhsak zawk an ni fo ṭhin hi thil dik a ni lo. Thiamna inangah chuan mitdel dik takte chu mit khaw hmuh fiah lote aia duhsak hmasak zawk an lo nih theihna tura theihtawpa hmalak.