Mizoram MP leh MNF-in Hindu lalram din turin Mizoram an hralh - Congress

Mizoram Pradesh Congress Committee (MPCC) chuan nimin khan thuchhuah siamin, Mizoram Lok Sabha MP C Lalrosanga leh a awmna party MNF-te'n Citizenship Amendment Bill (CAB) an thlàwp avangin Hindu lalram dinna turin Mizoram leh Mizo Kristiante an hralh ta tih an tarlang.

MPCC chuan, CAB 2019 chu Lok Sabha-ah pass ni mah se, Rajya Sabha-a pass a la nih loh avang-in, pass a nih nan uar lehzuala ṭawngṭai turin Mizoram mipui leh kohhrante an ngen a, "Congress party chuan Rajya Sabha MP Pu Ronald Sapa Tlau kaltlangin CAB 2019 dodal hna theihtawpin a thawk chhunzawm zel dawn a, Hindu lalrama India ram siam tumna hi dodalin, Mizoram mipui tan kan ding zel dawn a ni," an ti.

CAB chu Mizoram mipuiin an duh lo a, political party hrang hrangte leh kohhran thlengin an duh loh thu an aupui tawh tih sawiin MPCC chuan, "Presbyterian Kohhran phei chuan ṭawngṭai rualna hun an hmang hial a ni. Hetiang a ni chunga Lok Sabha rorelnaa BJP-te'n CAB an pu lut lui tlat leh pass luih a ni ta hi a pawi kan ti," an ti a; Mizoram leh hmarchhak mipui zah lohna dik takah an ngaih thu an sawi.

Mizoram MP C Lalrosanga'n CAB a thlàwp thu a sawi chu MNF party ticket-a thlan tlin a nih angin, MNF party hotute thu hmua sawi a nih thu tarlangin MPCC chuan, "Parliament ngeia CAB thlàwpna thu a sawi ta mai hi chu a mak kan ti a, kan rilru a na tak zet a, sakhua leh hnam pawisawina a nih avangin ngaihdam theih chi-ah kan ngai lo. Halleluia Chorus nena sorkarna bul ṭan a, 'Pathian leh kan ram tan' tih auhla neitute leh hnam party nia inchhál ṭhin MNF hian Hindu lalram din nan Mizoram leh a chhunga chêng Mizo Kristiante hi min hralh taah kan ngai," an ti.