Dan angin leivûng paih tur a ni - CM

Chief minister Lalduhma kaihhruaiin nimin khan CMO conference hall-ah Mizoram Pro - Active Governance & Timely Implementation (Mi-PRAGATI) ṭhutkhawm hmasa ber neih a ni. CM chuan, Mizorama kawngpui laihnaah dan anga leivûng paih tur a ni a, an paih loh chuan hnathawh chawlhtir rih mai tur a nih thu a sawi.

CM Lalduhoma chuan, Aizawl Western Side Bypass road laih meka leivûng paih dan fel lo chu chak taka bawhzui turin a mawhphurtute a hrilh a, "Contractor-in dan dik takin leivûng a paih tur a ni a, leivung paihna hmun (dumping ground) dan ang thlapin a siam tur a ni. Dan anga fel taka leivung paih a nih dawn loh chuan hnathawh pawh chawlhtir rih mai tur. Hmun danga NHIDCL kawngpui laihah pawh dan anga leivung paihna felfai tak siam tur a ni," a ti.

Ṭhutkhawmah hian sorkar hmalakna ṭhenkhat kalpui dan thlirho a ni a, harsatna an tawhte leh a chinfel dan tur sawiho a ni. Vairengte - Sairang national highway thlûr li tura laih mek te, Swadesh Darshan 2.0 hmanga Thingsulthliah Conference sak mek leh Unity Mall sak mekte an thlirho a ni.

Mi-PRAGATI hi sorkar laipui leh state sorkar project pawimawh zualte a hun takah zawh a nih theihna atana viltu tura din a ni a, chairman chu Chief Minister niin, Chief Secretary chu member secretary a ni. Member-ah state sorkara principal secretary, secretary, deputy commissioner leh Mizorama sorkar laipui depart-ment/agency-a hotute an tel.