Mizoram Police din champha lawm a ni; 'Thiamna changkang ber ber hmangin Police-te'n ruihhlo kan do dawn' - DGP

Mizoram Police chuan nimin khan kum 54 a tling a, Mizoram hmun hrang hrangah Raising Day lawm a ni. Director general of police Sharad Agarwal chuan, thiamna changkang ber berte hmangin police-te'n ruihhlo an do dawn thu a sawi.

Mizoram Police Raising Day hi Aizawlah chuan Police Headquarters-a GS Arya Mess-ah lawm a ni a, infuih tharna hun hman a nih bakah, police hna thawk ṭhate hnenah chawimawina hlan a ni. DGP-in thu a sawi a; IGP (Headquarters) H Ramthlengliana bakah, IPS leh MPS officer pension tawhte'n thu an sawi bawk.

DGP Sharad Agarwal chuan, Mizoram Police chu a tìrah tláwm têa bul ṭan ni mah se, tunah chuan thununna ṭha taka thuam, ram pum leh mipui innghahna kulhpui a nih tawh thu a sawi a, "Kum 1972 aṭanga vawiin thlengin Mizoram Police-te hi ralmuanna thlentu kan ni a, hun inlumlet mil zela mipui innghahna kan nih theihna bul chu thawktute thawhrimna, chhelna leh inpekna a ni," a ti.

Ruihhlo do chung­chang sawiin DGP chuan, "Mizoram Police chuan tunlai thiamna changkang ber berte hmangin ruihhlo do kan chhunzawm zel dawn a, demand reduction leh harm reduction lam pawh kan uar zual zel dawn," a ti a; kum 2025 chhungin police-te'n ruihhlo kaihhnawihah mi 483 an man a, thubuai 319 ziah luh a nih thu sawi.

Sharad Agarwal chuan, mipuite’n awlsam zawka online hmanga FIR an thehluh theih nan police station tinah CCTN bun tum a nih thu sawiin, "Mipui leh thawktute ṭanrualna zarah November 19, 2025 khan Mizoram chu 18th Urban Mobility India-ah chawimawina hlan a ni," a ti.

DGP hian tunlai thiamna mila Mizoram Police thuam chakna tur Police Modernisation Scheme hmangin hma an lak mek thu te, bullet-proof vehicle, forensic software leh hnu chhuina atana pawimawh hmanraw chi hrang hrang lei a nih tur thute a sawi bawk.

Mizoram chu Assam sorkar hnuaia district council aṭangin January 21, 1972 khan union territory-ah hlankai a ni a, Mizo District Council-a Assam Police awm mekte chu Mizoram Police-a leh (convert) nghal a ni. Mizoram UT sorkara IGP hmasa ber IJ Verma, IPS chuan January 21, 1972 ah IGP pisa a luah ṭan a, hemi ni hi Mizoram Police din ni-ah pawm a ni.