KHAWTHLIR

Thisen pe

Nimina Mizoram Police din champha vawi 54-na pualin police-te'n hmun hnihah thisen an pe. Mualpuia 3rd MAP chuan Civil Hospital, Aizawl tan thisen unit 11 an pe a, Lungleia police mipa pasarih leh hmeichhia pakhat te pawhin Lunglei Civil Hospital-ah unit riat an pe bawk.

Sangha dil 3,207

Fisheries department chuan nimin khan an conference hall-ah 'Official Briefing for 2026' an hmang a, Fisheries minister Lalthansanga'n a hmanpui. Fisheries secretary Lalrothanga chuan, Mizoramah sangha dil neia eizawng mi 22,661 an awm a, ram hectare 6,000 vela zauah sangha dil 3,207 a awm a, kum 2024-25 chhungin sangha metric ton 7,177 thar a nih thu a tarlang.

Khawlai tifai

Lunglei Luangmuala awm 2nd MAP-te chuan Mizoram Police din champha pualin nimin khan faina hnatlang an huaihawt. Lunglei khawpui chhung hmun hrang hrangah insem darhin, khawlaia bawlhhlawhte an tifai a ni.

Thlai damdawi hman dan inzirtir

KVK, Khawzawl leh SIRD, Thingsulthliah ṭang dun chuan nimin khan Tuipui community hall-ah thlai kahna damdawi hman dan inzirtirna an buatsaih a, kut hnathawktu mi 30 an tel. Khawzawl KVK senior scientist Dr Malsawmkimi'n a kaihruai a; Dr Lalngaihawmi leh SIRD aṭangin Zonunsangi leh R Vanlalmuanpuia ten thil pawimawhte an zirtir a ni.