Central YMA-in kumpuan an hawng CAA-ah NGO duhdan a hlawhtlingah kan ngai - CYMA President

Central YMA chuan January 24 zan khan Vanapa Hall-ah kumpuan 'Zirna Uar' hawn inkhawm an buat­saih a, CYMA president Vanlalruata chuan Citizenship Amendment Act (CAA) ah NGO duhdan a hlawhtlinga an ngaih thu a sawi.

Kumpuan hawn inkhawm kai­hruaitu CYMA President chuan CAA chungchangah NGO duhdan a hlawhtlinga an ngaih avangin aw an chhuah chhunzawm ta lo tih sawiin, "August 2019-a Union Home minister Amit Shah-a'n Mizoram a lo tlawh ṭumin pawn dum nena lo hmuh kan tum chu inbiak­na neih hnuah ṭhulh a ni," a ti.

Vanlalruata chuan Union Home Minister hnenah CAA an duh loh thu an thlen thu leh parliament a pharh a nih dawnah NGO leh political party aiawhte chuan Delhi-ah an sawiho tih sawiin, "Mi ṭhenkhatin a saseh huna tlan chhia anga min puhna hi a dik lo. Kan tlanchhe loa, CAA in Mizoram a huam tak loh avangin aw kan chhuah ta lo," a ti a, a hnuah party-te'n CAA chu inbeihna atan an hman thu a sawi.

MZP te CAA dodala an chetna chungchangah NESO anga hmalakna thil a nih avangin NGO Coordination Committee chuan hriatthiamna thui tak a nei tih sawiin CYMA President chuan, "CAA chung­chang hi YMA chauh hmalakna a ni loa, pawl hrang hrang hmalakna a ni. YMA bil anga hma lo lak a rem lo," a ti.

Vanlalruata chuan May 2017-ah a dodalna hi an lo kalpui tawh tih sawiin, "September 2017-ah Parliament-a GPC-te hmu turin kha ti laia CYMA president Lalbiakzuala hoin kal a ni a, Mizoram huam tir lo tura kan duhnate kan thlen.

Kum 2017 a Prime Minister alo kal pawhin CAA kan duh lohna kan lo thlen thu leh ahnuah pawh dodalna an lantir fo a, nikum Republic Day pawh mipui tel loin hmantir a ni," a ti. Thusawitu dang Kumpuan Committee chairman, CYMA vice president Lalhma­chhuana chuan YMA  chu mimal mi pakhat rorelna a ni ngai lo tih sawiin, "Mi tam tak, palai kalkhawmtena ro kan relna ṭhin leh branch level a ni emaw group level a ni emaw sub headquarters a ni emaw central a ni emaw ah a chuan committee anga rorel ṭhin kan ni," a ti a, YMA general conference chu rorelna sang ber a nih thu a sawi.

Lalhmachhuana chuan North Vanlaiphaia YMA general conference neiah palai sang chuangte chuan 'Zirna Uar' tih hi lungrual takin kumpuan atan an pawm thu sawiin, "Kan hriat ṭheuh angin 1996 leh 1997-ah te Zirna Uar lo kalpui a ni tawh. Chumi hnuah 'Ram leh hnam humhalh' tih chu tum 14 lai mai kan puang leh a ni," a ti. Min tibuaitu hrang hrangte hi kan tawpsan ang a, hei kan hlawhtling taa kan chawlhsan tawh tur a ni an tih loh thu sawiin Lalhmachhuana chuan, "Ram leh  hnam humhalh kumpuana kan puan chhungte, ruihhlo do kumpuana kan puan chhungte ṭhangkhat lian zet chhung hian sorkara thuneitu, district autho-

rity kan tihte chu hnamdang  an lo ni hman," a ti a, hnamdang deuh vekin min awp hman thu a sawi.

CYMA Vice President chuan kan state ca­pital-ah pawh office han dawr chuan a hotu liante chu hnam dang an lo nih a ṭul ta tih sawiin, "Zirna lam hi kan thlahthlam hmak e tihna a ni hauh lo. Amaherawhchu ruihhlo te, min nektu hnamdang hmun hrang hrangte leh ram rite kan beih chhung khan zirna lamah engemaw chen kan lo tlahniam a,  India ram puma zirna lama  pahnihna ni thin Mizoram chu kum 2011 census-ah pathumna kan lo ni hman a, zirna lamah kan lo tlahniam thuk ta hle mai," a ti.