MSPMC-in hostel sak mek 2 an endik

Mizorama hmasawnna hnathawhte endiktu Mizoram State Project Monitoring Committee (MSPMC) member-te leh Task Force member-te chuan nimin khan ITI Veng leh Khatlaa Working Women Hostel sak mek an endik.

MSPMC team hian hostel pahnih sak mek an endik hi a vawi hnihna a ni a; nimina endiknaah hian chipchiar takin an endik a, cement concrete chak zawng rebound hammer hmang endikin, a nih tur ang a tling vek tih an hmu. Hna thawh tawh chin chu a ṭha tlangpuiah an ngai a, zawh hun tura ruatah an sak zawh ngei theih nan ngawrh taka thawk zel turin contractor-te an chah.

Sorkar thuchhuah tarlan danin, ITI Venga Working Women Hostel sak mek hi SASCI sum vbc 18.18 hmanga sak niin, contractor chu Fanhau Agency a ni a; Khatlaa Working Women Hostel tur sakna atan SASCI aṭangin cheng vbc 29.72 ruahman niin, contractor chu Sky Builders a ni.

Hostel pahnih saknaa nodal department chu Women & Child Development niin, hna hi Mizoram PWD-in an enkawl a; May 9, 2026-a sak awh tura ruahman ve ve, hna pumpui aṭanga 15% vel zawh tawh ve ve a ni.