Project Rotling hmanga hmalakna sawiho

Rural Development & Administration (RDA) minister Prof. Lalnilawma hoin nimin khan a pisaah RDA department hotute'n video conferencing hmangin ni 100 inhlawhna MGNREGA hnuaia 'Project Rotling' hmanga hmalakna leh harsatnate an thlirho.

Project Rotling hi khawtlang mamawh ro tling siamna tura duan a ni a; Project Rotling - Hmasawnna Rahbi Thar hnuaiah short term project - kum khat chhunga zawh tur, medium term project - kum 2/3 chhunga zawh tur leh long term project - kum 5 chhunga zawh tur a awm.

Project Rotling - Hmasawnna Rahbi hi June 27, 2024 khan RDA Minister-in a hawng a; Mizorama Rural Development block 28 aṭangin concept paper 84 a lut a, chu'ng paper aṭang chuan a ṭha zual 15 thlan niin, khaw 22-ah hmalak a ni.

Prof. Lalnilawma chuan, project kalpuitute chu an hun tiam pêl loa a hun taka zawh hman tum turin a chah a, "RDA department kaltlang hnathawh reng reng a ṭha tur a ni. Thingtlang mipui tan malsawmna ni thei turin kan hnate kan thawk tur a ni a, Project Rotling hi a hming ang ngeiin thingtlang khaw tan ro tling a nih theih nan kan vaiin theihtawp kan chhuah zel a ṭul," a ti.

Ṭhutkhawmah hian RDA secretary R Zarzosanga, additional secretary V Lalengmawia leh RDA hotu dangte an tel a ni.