NE Media Conclave-ah MJA aiawhin 2 tel

Kohima Press Club chuan an 25-na, silver jubilee lawm nan January 20, Thawhlehni khan Kohima Capital Convention Centre-ah NE Media Conclave an buatsaih a, Mizoram Journalists' Association aiawhin president hlui Vanlalrema Vantawl leh member Andrew Lalremsanga an tel.

NE Media Conclave-ah hian thupui chu, 'Reimagining truth: Northeast journalism for a changing world' tih a ni a; MJA aiawha tel Vanlalrema Vantawl chu speaker zinga pakhat niin, 'Journalism as peace work: Navigating divides, building bridges & a strong media ecosystem for Northeast' tih a sawi.

Vanlalrema Vantawl chuan, buaina thleng chungchang chanchin tharah thup tur a nih loh rualin, boruak tisosang zawnga ziah loh erawh journalist-te tih dan tur, media ethics a nih thu a sawi a, "Mizoramah chuan a ṭul dan azirin buaina titawp tur leh inremna a awm theih nan MJA a che chhuak ṭhin," tiin, remna siam tura MJA hmalak tawh dante a sawi lang.

NE Media Conclave-ah chanchinbumi 100 vel an tel a; Kohima Press Club president Alice Yhoshu chuan inlawmna thu a sawi. Khuallian, Nagaland chief minister Dr Neiphu Rio leh khualzahawm Sangeeta Barooah Pisharoty, Press Club of India president ten thu an sawi bawk.