MP (LS) chungah AVBD an lawm

Association for Voluntary Blood Donation chuan thuchhuah siamin, Lok Sabha MP Richard Vanlalhmangaiha'n a MP fund aṭanga AVBD hnena bus a pek chu blood donation camp neihna atan hman ṭan a nih thu an tarlang a, Lok Sabha MP chungah an lawm tak zet thu an sawi.

AVBD chuan, "MP Pu Richard Vanlalhmangaiha'n a MP fund aṭanga Blood Donation Bus min pek chu harsatna neuh neuh chinfel a nih hnuah kan hmang ṭan thei ta a, MP chungah kan lawm tak zet. Bus hi Aizawl Civil, Hospital Model Blood Bank-in a thlawna thisen pek buaipui nan a ṭul apiangah an hmang dawn a ni," an ti.

Blood Donation Bus hi Tata Winger (New Model) AC niin, Rs 18,22,027 man a ni a, MP Richard Vanlalhmangaiha'n July 5, 2025 khan hlan tawh. Bus-ah chiang lo a awm avangin hman mai theih a ni lo a, Aizawl Civil Hospital Blood Bank chuan nimin khan a vawi khat nan blood donation camp neih nan an hmang a ni.