KHAWTHLIR

NGO-te'n Mizoram ṭhendarh remti lo

NGO Coordination Committee chuan thuchhuah siamin, "Mizoram hi ram zím tê a nih avangin ṭhendarh kan remti lo a; hetiang hawi zawnga hmalakna a awm a nih chuan NGOCC chuan a tawp thlengin a dodal zel dawn a ni," an ti. NGOCC hi nimin khan Central YMA Committee Room-ah an ṭhukhawm a, CYMA, MUP, MHIP, MZP, MSU aiawhte telin, Mizoram dinhmun an thlirho a ni.

Tomato chîn leh enkawl dan inzirtir

KVK, Khawzawl leh SIRDPR, Extension Training, Thingsulthliah chuan nimin khan Khawhai Village Council House-ah tomato chingtute pualin thlai ei chhetu rannung leh natna lan chhuah dan inzirtirna an buatsaih. Identification of Pest on Major Agricultural & Horticultural Crops-ah hian tomato chíngtu mi 30 an tel a, mithiamte'n thil pawimawhte an zirtir a ni.

Trainers' Meet

Nimin khan Synod Office-a Devotion Room-ah MSSU Trainers' Meet 2026 buatsaih a ni a, mi 51 an tel. Trainers' Meet hi Synod executive secretary i/c MSSU Rev. Dr K Lallawmzuala leh MSSU coordinator Upa Lalṭhahluna Ralte ten an kaihruai a; sunday school zirtirtu chungchanga hmathlir leh hmasawnna tura rawtnate sawihona nih bakah, Rev. Dr H Lalrinthanga'n zirlaibu a ziah dan a sawi a ni.

Thlai inzirtirna

NABARD chuan Reiek community hall-ah self help group member-te pualin Micro Enterprise Development Programme an buatsaih a, NEICORD executive director Guithuilung Daimei-in hawngin, February 6, 2026 thleng neih a ni dawn. NEICORD hian thei leh thlai ṭiakte sem in, tuia enkawl chhunzawmna hmanruate an pe a, ei tur sâwngbâwl, thlai enkawl leh gender training-te an bautsaih ṭhin a ni.

Phone bo hmuh pe lêt

Bawngkawn Police Station-in kumin January thla chhunga Central Equipment Identity Register (CEIR) system hmanga mobile phone bo an hmuh let 48 chu nimin khan Bawngkawn PS officer in-charge pisaah a neitute hnenah an pe lêt a; a vaiin Rs Rs 8,64,000 hû a ni. Bawngkawn PS hian nikum 2025 khan May aṭanga December thla thlengin CEIR system hmangin mobile phone bo 438 an hmu let a, Rs 1,05,12,000 hû niin, a neitute hnenah an pe let vek tawh a ni.