8th Schedule-a Mizo ṭawng a tel theih nan bawhzuitu tur task group din rawt

Chief minister Lalduhoma chuan nimin khan a pisaah Mizo Language Development Board hnuaia din Eight Schedules Study Group hruaitute a kâwm. Study Group hian India Danpui 8th Schedule-a Mizo ṭawng telh a nih theih nana bawhzuitu tur task group din an rawt.

Sorkar thuchhuah tarlan danin, 8th Schedules Study Group hian Mizorama pawl leh hnam pual hrang hrangte kâwm kualin, 8th Schedule-a Mizo ṭawng thun chungchanga an ngaihdante a zawt a; an kawm tawh zawng zawngte'n 8th Schedule-a Mizo ṭawng dah ṭha an ti. Study Group hian an report thehluh theihin an peih thawkhat tawh.

CM Lalduhoma chuan, hun rei lo te chhunga ṭha taka hma an lak avangin MLDB chungah a lawm thu a sawi a; an hmalaknate ûm zui zel dan tura rawtna an neihte chu ṭha a tih thu leh bawhzui a nih tur thu sawi.

Study Group hruaitute chuan, tun hmain sorkar laipuiah 8th Schedule-a Mizo ṭawng telh turin dilna Mizoramin a thehluh tawh rualin, umzuina a awm loh thu an sawi a; task group din a, dilna a thara thehluh a, chak taka bawhzui ṭhaa an ngaih thu CM hnenah an thlen a ni.

ṬHUTKHAWMA TARLAN

☑ Mizo ṭawng hi kum 1974 khan state official language-ah puan a ni a, Sahitya Academy-in regional language-ah pawmin, zirna lamah PhD thlenga zir theih a ni.

☑ Peoples Linguistic Survey of India chuan Mizo ṭawng chu ṭawng ṭhang mek a nih thu a sawi.

☑ UNESCO-in ṭawng him dan a tehnaah Mizo ṭawng chu 'vulnerable' huangah a dah.

☑ Chhiarpui hnuhnung ber (2011)-a tarlan danin, India ram state 26 leh UT pasarihah Mizo ṭawng hmang an cheng a; chhiarpui tharah chuan India rama state tinah an awm tawh rin a ni.

☑ 2011 chhiarpuiah Mizoramah Mizo ṭawng hmang mi 8,30,846 an awm.

☑ Khawvel pumah Mizo ṭawng hmangtu mi nuai 22 chuang an awm tawha ngaih a ni.

☑ Google translate-in May 11, 2022 aṭangin Mizo ṭawng chu ṭawng danga lehlin theihin a dah.