Sciene leh maths ti ṭhate lawmman hlan; 'Zirna atan zirchianna neih zel a ni dawn' - Education Minister

SCERT-a Science Promotion Wing chuan nimin khan Vanapa Hall-ah HSLC leh HSSLC 2025-a science leh mathematics subject-a ti ṭha hnenah lawmman sem imnkhawm an buatsaih a; khuallian Education minister Dr Vanlalthlana chuan, zirna ṭha nei turin zirchianna neih zel a nih dawn thu a sawi.

Education Minister chuan, science leh mathematics chu subject pawimawh a nih thu sawiin, "Kawvel thiamna ṭhang zelah mamawhna a sang zel a, heng subject-a tui mi leh taima taka zir ṭhin Mizoramah an awm hi a lawmawm. Zirna ṭha zawk kalpui a nih zel theih nan sorkar chuan zirchianna leh ruahmanna ṭha a nei zel dawn," a ti.

Hlawhtling turin taimak a pawimawh thu sawiin Dr Vanlalthlana chuan, "Khawvel hriata mi ropui leh hlawhtlingte hi vawi tam tak hlawhchham chunga beidawng duh lote an ni," a ti a; hlawhchhamna karah pawh beidawng mai loa ṭang fan fan turin zirlaite a chah.

Nimina 48th Incentive Cash Award for Proficiency in Science & Mathematics 2024-25 hi thawh hniha ṭhen a ni. Thawh khatnaah zirlaite’n hlâwk zawha mathematics leh science hriatthiam an neih theih nan hun hman a ni a; thawh hnihnaah science leh mathematics-a ti ṭhate hnenah Education Minister-in award a hlan.

SCERT Science Promotion Wing hi kum 1973 khan Education department hnuaiah din a ni a; kum 1978 khan Incentive Cash Award for Proficiency in Science & Mathematics hi Mizorama science leh mathematics zirnain hma a sawn theihna tura duan niin, Assembly House-ah pawm (legislate) tawh a ni.

Incentive Cash Award for Proficiency in Science & Mathematics dawngte theite chu MBSE-in HSSLC leh HSLC examination a buatsaiha science leh mathematics-a ti ṭha zual pathum ṭheuh (top 3)-te an ni.