AH&Vety hmun sawn dan tur sawiho

Chief minister Lalduhoma hoin nimin khan CMO conference hall-ah Thenzawl Peace City Master Plan huam chhung aṭanga Neihloh khaw thar tura AH&Vety hmunhma sawn chungchang sawiho a ni.

Sorkar thuchhuah tarlan danin, Thenzawl Master Plan hi IPE Global-in an siam mek a, sorkar chuan Peace City behchhan hian SASCI aṭanga incentive cheng vbc 150 hmuh tumin ruahmanna a siam mek. Tuna AH&Vety leh Fisheries department hmunhma vel chu ruahmannaah chuan Peace City laili ni tura ngaih a ni.

Neihloh khaw leilung a him loh avangin kum tam tak buaina an tâwk tawh a, khawtlang mipuite'n an khaw ram chhungah vêka insawn an dil angin sorkarin insawn dan tur a ruahman a, hmalakna thui tak a kal tawh.

Ṭhutkhawmah hian UDPA minister K Sapdanga, PWD minister Vanlalhlana, AH&Vety minister C Lalsawivunga, Tourism minister Lalnghinglova Hmar leh mi pawimawh dangte an tel a; Neihloh khaw thar tur aṭanga hla vak loah AH&Vety hmunhma sawn dan tur ngaihtuah a ni.