MLA pahnihin RYA buatsaih Ranglong Khohui hmanpui

Ranglong Youth Association (RYA) buatsaihin January 20-22, 2026 chhung khan Panisagar, North Tripura-ah Ranglong kût ropui ber, Ranglong Khohui vawi 9-na hman a ni a, adviser to chief minister pahnih Lalmuanpuia Punte leh Dr Lorrain Lalpekliana Chinzah ten an hmanpui.

Khuallian Lalmuan-puia Punte, MLA chuan, ZPM kaihhruai Mizoram sorkarin Zo hnahthlak inpumkhatna leh inunauna a ngaih pawimawh thu sawiin, “Ranglong emaw, Zo hnahthlak dang tute pawh ni se, Mizo vek kan ni a, kan ṭawng hmante pawh Mizo ṭawng vek a ni. Duhlian ṭawng kan hman loh avangin Mizo ta lo bik riaua inngaihna hi a dik lo a, Mizote'n kan ṭawng hman tlanglawn ber Duhlian/Lusei ṭawng hmang ve lo hi Mizo lo deuha kan ngai ṭhin te hi a dik lo. Zo hnahthlak ṭawng hrang kan hmang mai zawk a ni,” a ti.

Dr Lorrain Lalpokliana, MLA chuan, hmanlaia Mizo hnam hrang hrangte indoin, inrûn ṭhin mah se, tuna Zo hnahthlak an lêngho dial dial chu lawmawm a tih thu a sawi a; Ranglong hnam nun leh tih dante vawng nung zel turin Rangling mipui a chah.

Ranglong Khohui hi Zo Reunification Organisation (ZoRO) Gen. Hqrs hruaitute pawhin an hmanpui a; ZORO aiawha thusawitu ZORO Ṭhalai general secretary Chinkhanmanga Thomte chuan, Tripura-a Zo fate chu chîmral an nih loh nan leh hnam anga an nun khawchhuah theih nan insuihkhawm an mamawh thu a sawi a, "Hei hi kan damdawi leh ralthuam neih ṭhat ber leh awm chhun a ni," a ti.