Chatlak loa tui herh haw theihna tur '24X7 Pilot Project' bul ṭan a ni

Public Health Engineering minister Prof. Lalnilawma chuan January 22, Ningani zan khan AMRUT 2.0 hnuaia mahni in leh kawtkaia kar tluana chatlak loa tui herh haw theihna tura duan, '24X7 Pilot Project' chu Vaivakawn leh Chawnpui veng hmun ṭhenkhata kalpui turin a hawng.

24X7 Pilot Project-ah hian thla 4-6 chhungin hna zawh tum a ni a; mobile phone-a message leh thlalakte inthawn dan ang deuhin system hian hna a thawk dawn. Consumer water meter reading, tui dawn zat, valve hawn leh khar, tuizema tui awm zat (level) leh tuizem aṭanga tui chhuak zatte gate-way leh cloud storage hmangin communication, monitoring leh operation siam tum a ni.

Mobile application leh cloud storage hmangin a enkawltu engineer-te'n control room emaw, an smartphone emaw aṭangin tuizema tui level-te (real time monitoring), tuizem aṭanga tui chhuak zat te, valve hawn leh khar te, consumer-in tui an hman dan te, an meter reading-te an hmuh vek dawn. Signal-in a man ṭhat theih lohna hmuna smart meter-te chu hand held device kengin a bul hnaiah emaw, signal a man phakna aṭangin emaw meter reading tih theih a ni dawn bawk.

Prof. Lalnilawma chuan, kar tluan (24X7)-a tui herh haw theihna tur project chu Mizoram tan méllung pawimawh a nih thu a sawi a, "Pilot project a nih angin chhungkua/in 300 a huam dawn a, smart meter vuah vek tur niin, pipeline network thar hman a ni dawn. Tuna a huam phak loh tan pawh ruahmanna siam lâwk nghal a ni ang," a ti.

Hmasawnna hna thawhah PHE department-in harsatna an tawh ṭhin thu sawiin Minister chuan, "Hnathawh nan in hmun leh ramte khawih chêt a ngaih châng a awm fo avangin, veng ṭhenkhatah chuan veng neitute'n an remti lo ṭhin. Forest clearance leh environmental clearance laka harsatna awm ṭhinte avangin hnathawh a harsat châng a tam bawk. 24x7 Pilot Project kalpuina tura veng mipui inpeknaah kan lawm hle," a ti a; khawpui dangah pawh tui hnianghnar an neih theih nan sorkar laipuiah project lian tak tak thehluh a nih thu a sawi.

Prof. Lalnilawma chuan, khawpuia tui pipe tam tak, kum 15 atana tihte chu kum 30 chuangte a nih tawh thu sawiin, tui renchem turin mipui a chah a; pipe aṭanga tui pût PHE-a hriattirna tur tui leak app pawh hmang ṭangkai turin mipui a ngen.

PHE Minister chuan, "Infrastructure nei ṭha thei mah ila, kan tuihnâ ber a kang chah zel chuan awmzia a awm dawn lo a, chuvangin, tuihna kan humhalh a ngai a, department hrang hrangte pawhin an vei tlàn a ṭul," a ti a; YMA-te nen tuihna humhalhnaah thawhhona tur thuthlung an zaih thar dawn thu a sawi bawk.

24X7 Pilot Project hawnna inkhawm hi Helen Lowry Auditorium-ah buatsaih niin, PHE secretary Zodingpuii'n a kaihruai a; bialtu MLA Lalnghinglova Hmar, adviser to CM pahnih - TBC Lalvenchhunga leh Lalmuanpuia Punte bakah, PHE department hotute leh khawtlang hruaitute an tel a ni.

24X7 PILOT PROJECT

☐ UDPA kaltlanga Ministry of Housing and Urban Affairs MoHUA aṭanga hmuh cheng vbc 5.24 senga thawh tur a ni.

☐ Vaivakawn leh Chawnpui venga chhungkua/in 300-ah pilot project anga hmalak a ni dawn.

☐ Thla 4-6 chhunga zawh tum a ni.

☐ Tui level monitor-na tur ultrasonic level indicator te, automated valve leh flow meter-te tuizemah vuah a ni ang.

☐ Consumer 300 hnenah smart water meter a thlawnin vuah a ni dawn.

☐ Tui connection pipe leh distribution network thar eng emaw zat siam a ni dawn.

☐ Consumer-te'n an tui hman tawh dan te, tui an hman tam lutuk chuan warning an hmuin an en thei dawn.