Ṭhelrêt sâwngbâwlna tur khawl thar 100 leina tur sorkarin a pawm tawh

Chief minister Lalduhoma chuan nimin khan Chungtlang khuaa ṭhelrêt chingtute huan a tlawh a, ṭhelrêt sawngbawlna tur khawl thar 100 leina tur sorkarin a pawm tawh thu a sawi.

CM Lalduhoma chuan, Chungtlang khua chu ṭhelrêt ngah khua an nih thu a sawi a, "Rubber hi kan rama tualṭo thing a ni a, sorkarin a buaipui ṭan hun chu 1982 vel aṭangin a ni. Sorkarna kan chelh hma zawng khan scheme hrang hrang aṭanga chìn tawh hectare 3,025 vel a awm a, mimala ching an awm nual. Mizoramah hectare 50,000 vela zauah rubber hi a chìn theih niin kan hria a, CM Rubber Mission hmangin kum 5 chhunga hectare 11,500-a zauah chin khah kan tum dawn," a ti.

Ṭhelrêt sawngbawlna khawl thar 100 leina pawm a nih tawh thu sawiin Lalduhoma chuan, "Kumina hnài huna hman theih hman kan tum. A ching tura thlante'n theihtawp chhuah se, sorkar pawhin theihtawp kan chhuah dawn. He mission hmang hian rubber thar tam ramah Mizoram hi siam i tum ang u," tiin ṭhelrêt chingtute a sáwm.

LRSWC minister Lalthansanga pawhin thu sawiin, CM Rubber Mission chu a tìr atangin Pathianin mal a sawm a, a tluang hle niin a sawi a, "Nikum lamah pilot phase kan kalpui a, kûng nuai 4.5 kan phun tawh a, kuminah nasa zawkin kan bei leh dawn. He Mission hi a hlawhchham thiang lo tih hi kan ngaihdan a ni," a ti a; Mizorama ṭhelrêt chin tamna ber chu Chungtlang a nih thu sawiin, ṭang zual zel turin a chah.

Chungtlang Rubber Producer Society president Malsawmthanga sawi danin, Chungtlangah chhungkua 105 an awm a, CM Rubber Mission phase-2 hnuaiah ṭhelrêt chinna atan ram hectare 950-a zau an hmu a, phase 2-a dawng tam ber pathumna an ni. CM Rubber Mission Phase 2-ah hian ram hectare 2,575-a zauah ṭhelrêt nuai 11 chuang phun a ni dawn a, a chingtu turte'n a hmun tur an vât mek.

Kum 10 liam ta khan Chungtlangah ṭhelrêt chin ṭan a ni a, 75,000 vel an phun a, a dam kim vek lo. Kum 2024 aṭangin kung 30,000 vel an hnái ṭan a, khawl an indaih loh avangin an ṭhelrêt zawng zawng an la hnái thei lo. Kum 2025 chhung khan ṭhelrêt aṭangin cheng nuai 70 vel an la lut a ni.

Mizoram sorkar chuan ṭhelrêt huan panna kawng tun hnaiah a siam ṭha a, concrete pavement-a siam zuina tur cheng nuai 50 a pe a ni.