KHAWTHLIR

Thisen pe

Ebenezer Institute of Technology chuan nimin khan Kanan Venga an hmunah thisen pek an huaihawt a, Civil Hospital, Aizawl tan thisen unit 37 an pe a, petute mipa 22 leh hmeichhia 15 an ni.

Bial conference

Kristian Ṭhalai Pawl (KṬP)-te chuan nizan khan pastor bial hrang hrangah bial KṬP conference an hmang ṭan. Biak KṬP conference-ah hian vawiinah rorel a ni dawn a, Pathianni zanah inkhawmpiu a ṭiak ang. KṬP report hnuhnung bera a lan danin, pastgor bial 223-ah KṬP branch 907 a awm mek a, member 1,77,548 awmin, mipa 1,07535 leh hmeichhia 70,013 an ni.

MLA-in ṭanpuina pe

Aizawl South-II bialtu MLA Lalchhuanthanga chuan nimin khan a bial chhunga Health Workers Training School, Kulikawn hnenah refrigerator leh water cooler a pe. MLA chuan, health worker hna zir mekte chu khawvel hmun hrang hranga thawk thei turin, taimakna leh tumruhna, teirei peihna nen ṭhahnemngai taka zir turin a chah a, "In hma hun a êng hle a ni," a ti.

Kawng khar dawn

Traffic SP C Vanlalvena chuan thuchhuah siamin, PWD-in Bawngkawn leh ITI Veng inkar kawngah Saron Veng pengṭhuam thleng an siam dawn avangin, vawiin aṭanga hna thawh zawh hma chu ni tin zan dar 9 aṭanga zing dar 5 inkarah hna thawhna huam chin zel kawng khâr a nih dawn thu a puang.

IJU leh MJA

Indian Journalists Union (IJU) hruaitute chuan January 22, Ningani khan Aizawl Press Club an tlawh a, MJA hruaitute nen an inkâwm. IJU hruaitute hi president Geetartha Pathak, vice president Basheer Madala leh Sunita Devi te an ni a; MJA chuan MJA sash leh golden jubilee souvenir bakah, memento an lo hlan a ni.