Thenzawlah SDO (Civil)-in Revenue SO hna a kawp dawn

Land Revenue & Settlement (LRS) minister B Lalchhanzova chuan, Thenzawl SDO (Civil) chuan Revenue Settlement Officer (SO) leh Sub Registrar Officer (SRO) hna a kawp tawh dawn tih a puang.

LRS department chuan nimin khan Thenzawl Golf Course conference hall-ah mipui hnena 'Strengthening of Revenue Administration in SDO Civil, Thenzawl' hrilhfiahna hun an buatsaih a; B Lalchhanzova chuan, Thenzawl SDO-in SO leh SRO hna a kawp tawh dawn thu sawiin, "Hetianga hmalakna hi kalpui zel tum a ni a, Thenzawl hi a bul ṭanna a ni," a ti.

LRS Minister chuan, SO chu December 17, 2025 aṭang khan koh dan thar, assistant commissioner tih tawh tur tiin puan a nih thu sawiin, "Thenzawl SDO (Civil) chuan SRO mawhphurhna zawng zawng lain, assistant commissioner a ni tel dawn a, DC zàr zawmtu leh huang khata awm kan ni tihna a ni," a ti a, Serchhip DC chu an district-ah revenue head a nih tâk thu a sawi.

B Lalchhanzova chuan, LRS department-in Thenzawlah bung thar an kai tih sawiin, "Kan hmalakna hi puanzar nasat a ngai. A technical avang hian mipui hriat turin kawng hrang hranga puanzar hi ṭan lak kan ngai hle a ni," a ti.

LRS secretary Vanlalmawia pawhin thu sawiin, "He hmalakna hian sorkar inrelbawlna mipuite hnenah a hûng hnai a, hei hi kan tum ber a ni. Pilot project atan Thenzawl leh Vairengte thlan a ni a, a thuam ṭhat nan sorkarin SASCI aṭangin cheng nuai 250 ve ve min pe," a ti a; cheng nuai 250 chu Thenzawlah chuan in sak belhna atan hman tura ruahman a nih thu a sawi.