IndiaSkills NE-ah Mizoram champion
Ministry of Skill Development & Entreprenuership-in Guwahati University-a IndiaSkills Northeast Regional Competition 2025-26 a buatsaihah Mizoram team pakhatna an ni a; gold leh silver medal latute chu national level India Skills Competition-ah India hmarchhak aiawhin an tel dawn.
Hmarchhak state hrang hranga ṭhalaite thiamna leh kutchhuak fiahna, IndiaSkills Northeast Regional Competition 2025-26-ah hian thil chi 26-ah intihsiak a ni a; Mizoram team chuan thil chi (trade) 20-ah inelna hmachhawnin, gold medal pakua, silver medal pathum, bronze medal pathum leh medallion for excellence paruk an la a, pakhatna an ni.
Gold medal leh silver medal latute hi national level India Skills Competition-ah Northeast Region aiawhin an tel dawn a; an tih ṭhat dan azirin World Skills Competition leh Asian Skill Competition-ahte India aiawhin an tel thei dawn a ni.
Northeast Regional Skills Competition-a Mizoram aiawhtute hi Labour, Emoployment, Skill Development & Entrepreneurship department-in December 8-12, 2025 chhunga Mizoram Skills Competition a buatsaih hmanga thlan an ni.