CM hoin ruihhlo do zel dan tur sawiho; Operation Jericho-ah ruihhlo vbc 196.42 hû man

Chief minister Lalduhoma hoin January 24, Inrinni khan Chief Ministers Office-ah Mizorama ruihhlo do dan thlir let a ni a, kalpui chhunzawm dan tur an rêl. September 1, 2025-a ṭan Operation Jericho hnuaiah January 13, 2026 thlengin ruihhlo cheng vbc 196.42 hû man a nih thu tarlan a ni.

CM Lalduhoma chuan, ruihhlo chu hnam hmelma lian ber a nih thu sawiin, "Ruihhlo do kawngah sorkar leh khawtlang ṭanrual a pawimawh. Mizorama ruihhlo lo lutte danchah a nih theih nan Home department, Excise & Narcotics department (END) leh Central YMA-te ṭanghoin September 1, 2025 khan ramri hrûl khaw 22-ah Operation Jericho an kalpui a, September 1 aṭanga January 13, 2026 thlenga ruihhlo man tawh hlut zawng chu cheng vbc 196.42 a ni," a ti.

Ruihhlo donaah chak zawka hmalak a nih theih nan Mizoram sorkarin December 2024 khan Saitual, Khawzawl leh Hnahthialah Excise & Narcotics station a hawn thu sawiin Lalduhoma chuan, "Rél luhna Sairang leh Bairabi-ah Excise station hawn phalna peih a ni a, March 14, 2025 khan END-a thawktute chet velna tur lirthei 18 lei a ni," a ti a, Mizoram sorkar aṭangin LMV pathum ruahman a nih thu a sawi.

Chief Minister chuan, END-a thawktute indaih lohna phuhrûk nan post 16 siam thar a nih thu te, direct recruitment hmangin mi 28 lak a nih tawh thu te, mi 39 lak belh leh tura inbuatsaih mek a nih thu te, kum 2025 chhungin ruih theih thil kaihhnawihah thubuai 319 ziah luh a nih thute a sawi bawk.

Home minister K Sapdanga chuan, ruihhlo donaa END thâ tichak tura Home department leh CYMA tha thawhna chuan awmzia a nei thui hle tih a sawi a; Aizawl bakah district hrang hranga ruihhlo tihrêmna tura sorkar an thawhpui ṭhinnaah a lawm thu a sawi.

END minister Lalnghinglova Hmar chuan, inbiakpawhna leh inkalpawhnaa hmasawnna vangin Mizoramah khualzin tam zawk an luh mek thu a sawi a, "Aizawl hmun laili lai leh a chhevela ruihhlo ngai, hmuh nuam lo tak tak awm ṭhinte chuan zin mite rilruah Mizoram hmel a tihbalh phah thei. Ruihhlo dona leh ruihhlo ngaite enkawlnaah END chuan sorkar deparment dang te, YMA leh khawtlang thawhpuina a mamawh a ni," a ti.

CYMA general secretary Prof. Malsawmliana tarlan danin, December 10, 2025 khan YMA kumpuan hawn a ni a; police-te nen ṭangrualin December 10, 2025 - January 12, 2026 chhung khan ruihhlo ngai, khawlaia teirawlai mi 192 khawm niin, chung zinga mi 85 chu home/centre-ah dah an ni. CYMA-in January 20, 2026 khan Central Anti Drugs Squad 24 din a ni a, Aizawl chu zone 10-ah ṭhenin an vil dawn a ni.

Ṭhutkhawmah hian ruihhlo ngaite enkawl a, eizawnna tlak thiamna an neih theihna tura home/centre awm sa ṭhenkhat thawm ṭhat dan tur sawiho a ni a; ramri hrul, ruihhlo luh tamna hmuna ngaihahte police outpost siam belh dan tur rêl a ni bawk.