KHAWTHLIR

Thisen pe

January 24, Inrinni khan Saron Veng Branch YMA chuan Civil Hospital, Aizawl tan thisen unit 34 an pe a, petute mipa 26 leh hmeichhia pariat an ni. ṬKP, Theiriat Bialin Civil Hospital, Lunglei tan unit 64 an pe a, petute mipa 54 leh hmeichhia 10 an ni a; ṬKP, Champhai Bethel Bial pawhin Champhai District Hospital tan unit 22 an pe a, petute mipa 16 leh hmeichhia paruk an ni.

Chetsualnaah thi

Lalramliana (18) s/o Lalpianfeli, Sairang Dinthar chu January 23, Zirtawpni zan khan lirtheia chetsualna vangin a thi. Sairang Dinthar aṭanga thu dawn danin, Lalramliana hian scooty (scooter)-in Sihhmuiah truck ding lai a sû a, kâ pawh chhawn lohin a thi nghal a ni.

Ngúrah heroin leh meth man

Excise & Narcotics department leh 14th Assam Rifles ṭang dun chuan January 23, 2026 khan Champhai district-ah heroin leh methamphatamine eng emaw zat an man. END leh AR te hian January 23 chhun dar 11:45 khan Champhai leh Hnahlan inkar kawnga Ngûr kâwnah Lalhmangaihzuala (30) s/o Thawmliana (L), Ngur Vengthar nia inchhál hnen aṭangin methamphetamine mûm 20,200 (kg 2.2) an man a; tlai dar 5:45-ah Ngur kâwnah vêk Shavin Ahmed (24), Nilambazar, Karimganj district nia insawi hnen aṭangin heroin gram 255 an man bawk.

SMS lem

Power & Electricity department chuan hriattirna tichhuakin, electric bill chungchangah misual ṭhenkhatin mipui bum tumin SMS an thawndarh thu leh heng mite hi Mizoram pawn lam mite nia hriat a nih thu a tarlang a; "Power & Electricity department aṭanga SMS thawn chhuah chu SMS sender ID ah GOVMIZ' tih a awm vek a, phone number satliah aṭanga SMS chu rin loh tur a ni. Hetianga pawisa lo pe tawh kan awm a nih chuan Cyber Crime Police Station, Treasury Square-ah thubuai ziah luh theih a ni," a ti a, fimkhur turin mi tin a chah.