National Voters’ Day 2026 hman a ni

Nimin January 25 kha National Voters’ Day a ni a, India ram pumah hman a ni. Mizoramah pawh district hrang hrangah hman a ni a, Pathianni a nih avangin January 24 khan hman a ni hlawm.

National Voters’ Day hi voter naupang zawkte ram hruaitu thlannaa nasa zawka tel tura chawh phûr nan sorkar laipui chuan January 25, 2011 khan Election Commission of India din ni (January 25) chu National Voters’ Day atana a puang a; kumin hi NVD vawi 16-na niin, thupui chu ‘My India, My Vote’ tih a ni.

Aizawlah chuan SP Confe-rence Hall-ah chief electoral officer Dr Lalrozama hoin Voters Day hman a ni a; CEO hian vote nei thar mi 11 hnenah electoral photo identity card (EPIC) a hlan a, district award a sem bawk.

Dr Lalrozama chuan, vote nei tharte chu voter an nihna dik taka hmang tura fuihin, "Democracy leh inthlanna reng reng chu mipui vanga hlawhtling a ni. India democracy chuan mi chi hrang hrang inang lo tak tak a huam avangin ram hruaitu thlannaa inrelbawlna ṭha neih a pawimawh. Inthlanna chu thianghlim, felfai, langtlang, mipui rinkai leh huap zo a ni tur a ni," a ti. Booth level officer-te'n mapping an kalpui mek a, 87% vel an zawh tawh thu a sawi bawk.

Aizawl district election officer Lalhriatpuia, bawrhsap tarlan danin, Aizawl district-ah MLA bial (constituency) 12 a awm a, electoral registration officer (ERO) 12 leh assistant ERO paruk an awm. Aizawl district-ah polling station 324 leh BLO 324 an awm a; voter 2,92,785 awmin, mipa 1,36,713 leh hmeichhia 1,56,072 an ni. Electoral roll ennawn (revision) hnuhnung ber, January, 2025 aṭanga January 25, 2026 thlengin vote nei thar mi 1,219 an awm.

National Voters’ Day hmannaah hian ERO, AERO, BLO-te bakah, vote nei tharte leh tlawmngai pawl, kohhran leh political party aiawhte leh thuthar thehdarhtute an tel a; election officer Samuel Zodinsanga kaihhruaiin thutiam an sawi rual a ni.