Car chesualah mi 2 an thi

January 25, Pathianni chhun dar 12:30 vel khan Luangpawn leh Phullen inkarah car a chesual a, car-a chuang mi pathum zinga pahnih a hmunah an thi a, pakhat a hliam.

Luangpawn aṭanga thu dawn danin, car-ah hian Luangpawn aṭanga Phullen Vengthar Pastor Bial KṬP Conference-a tel tura kal mi pathum an chuang. Car neitu leh khalhtu Lalthansanga (33) s/o B Lalṭanpuia leh Lallawmsanga (37) s/o H Lalramvula te a hmunah an thi a; Lalnunzira s/o Laldina (L) a hliam a, Saitual District Hospital-ah enkawl mek a ni.

Car chetsualna hmun hi kham chhengchhe lai a ni a, ruang leh hliam lak chhuah pawh a hautak hle niin an sawi. Mitthite hi nimin khan vui an ni.