KHAWTHLIR

Bike Rally buatsaih

Saitual district Nasha Mukt Bharat Abhiyan (NMBA) chuan Republic Day vawi 77-na pualin nimin khan ruihhlo ṭhat lohzia puanzar nan Bike Rally an buatsaih a, district bawrhsap Dr Lalngura Tlau-in DC Bangla aṭangin a vailiam. Bike Rally hian a tum ber chu, ṭhalai zawkte hnena ruihhlo hman sual pawizia hriattir a ni a; Saitual Gym Club member-te chu Saitual DC Bangla - Keifang - Rulchawm - Ruallungah te bike hmangin kawng an zawh a ni.

Fimkhur turin chah

Power & Electricity department chuan hriattirna tichhuakin, electric bill chungchangah mi ṭhenkhatin mipui bum tumin SMS an thawn darh a, chutianga ti ṭhinte chu Mizoram pawn lam mite nia hriat a nih thu a tarlang a, fimkhur turin mipui an chah. Power & Electricity department aṭanga SMS thawn chhuah chu SMS sender ID-ah 'GOVMIZ' tih a awm vek tih tarkangin, "Phone number satliah aṭanga SMS chu rin loh tur a ni. Hetianga pawisa lo pe tawh kan awm a nih chuan Cyber Crime Police Station-ah thubuai ziah luh theih a ni," an ti.

Lawmman dawng

Mizoram State Health Care Society chuan National Health Authority-in January 19-20, 2026-a Bhubaneshwar, Odisha-a a buatsaih Chintan Shivir-ah AB-PMJAY scheme hnuaia beneficiary enrolment (golden card siam)-ah state dang pali nen Best State lawmman a dawng. Lawmman hi Mizorama golden card nei thei chhungkaw 2,16,584-te zingah chhung tin aṭangin member pakhat talin golden card an siam tawh tih a entir. Tun dinhmunah Mizoramah golden card nei mi 5,93,595 an awm mek a ni.

Kuhva rah man

Assam Rifles chuan January 25, Pathianni khan Tlangnuam, Aizawlah ram dang kuhva rah nia hriat ip 339 an man a, cheng nuai 180 mana chhût a ni. AR hian kuhva rah neitua puh mi pathum an man bawk a; Customs hnenah an hlan a ni.