Mizoram pumah Republic Day lawm a ni

Nimin khan Mizoram hmun hrang hrangah India Danpui (Constitution) hman ṭan ní, Republic Day vawi 77-na lawm a ni a; Republic Day puala intihsiakna hrang hrang lawmman sem a nih bakah, mi chhuanawmte leh khua/veng/department thawk ṭhate hnenah chawimawina hlan a ni.

LUNGLEI

Lungleiah chuan district bawrhsap Navneet Mann hoin C Ṭhuamluaia Mualah Republic Day lawm a ni. Bawrhsapin hnam puanzar a pawt pharh a, hnam puanzar chibai bûktu parade contingent 22-te a chhâng lêt.

Navneet Mann chuan, India Danpui chu khua leh tuite tana dikna, zalenna, intluktlanna leh inunauna siamtu a nih thu sawiin, "Ram inrelbawlna hi dan leh hrai hmanga inenkawlna chauh ni loin, khua leh tui zawng zawng huap zo, khua leh tuite zahawmna vawn nunna leh rawngbawlsakna a ni," a ti.

Bawrhsap hian parade contingent leh Republic Day pual intihsiaknaa ti ṭhate hnenah lawmman a hlan a, Project BLOOM 2025 Award a sem bawk.

SIAHA

Siaha District Football Association (SDFA) Ground-ah Republic Day lawm a ni a; district bawrhsap VL Hruaizela Khiangte-in hnam puanzar pawt pharhin, parade contingent 19-te'n hnam puanzar chibai an bûk a chhâng lêt.

Siaha Bawrhsap chuan, India Danpuiin mi tinte chu zalenna, dikna leh intluktlanna a pe tih sawiin, "Nun nuam taka an khawsak theihna turte a ruahmansak bakah, thlamuang leh hahdam taka an khawsak tlàn theihna tur kawngte a kawhhmuh," a ti a; parade contingent ti ṭha te, khua leh veng fai inelnaa ti ṭhate hnenah lawmman a hlan.

CHAMPHAI

District bawrhsap Mohammad Aaquib hoin Chhangphut Field-ah Republic Day lawm a ni a; Bawrhsapin hnam puanzar a pawt pharh a, parade contingent 17-te'n hnam puanzar chibai bûk a chhâng.

Mohammad Aaquib chuan, India danpui siamtu te, ram hruaitu hmasate leh zalenna sualtute zahna chibai bûk turin kal khawmte a sawm a, Danpuiin a zirtir hrang hrangte chhawm nung reng turin a fuih. Parade contingent ti ṭhate hnenah lawmman a hlan a ni.

KOLASIB

Kolasib-ah chuan Kolasib Sports Stadium-ah Republic Day lawm a ni a; district bawrhsap Robert C Lalhmangaiha'n hnam puanzar pawt pharhin, parade contingent-12 in hnam puanzar zahna chibai an bûk a chhang let.

Robert C Lalhmangaiha chuan, sorkar hnathawkte chu an hna chu eizawnna mai ni loa mipui rawngbawlna a nihzia hria a, mipui hamṭhatna ngai pawimawh turin a chah. Bawrhsap hian parade contingent ti ṭhate hnenah lawmman a hlan.

SERCHHIP

Serchhip Sports Complex-ah Republic Day lawm a ni a; Serchhip district bawrhsap Paul L Khuma'n hnam puanzar a pawt pharhin, hnam puanzar zahna chibai buktu parade contingent 13-te a chhang let.

Paul L Khuma chuan, India Danpui laimu - dikna, zalenna, intluktlanna leh inunaunate chu a thara vawng nung turin kal khawmte a sawm. DC hian parade contingent ti ṭha te, VC fai inelnaa ti ṭha te, mimal anga faina kawnga hma la ṭha te, Republic Day pual intihsiakna leh reels insiamsiak lawmmante a sem.

LAWNGTLAI

Republic Day hi CYLA Playground-ah lawm a ni a, district bawrhsap Donny Lalruatsanga'n hnam puanzar a pawt pharh a, parade contingent 14-te'n hnam puanzar zahna chibai an bûk a chhang let.

Donny Lalruatsanga chuan, India Danpui, hnam puan zar leh hnam hlate zah a, mi dang zirtirtu nih tum tlat turin mipui a chah a; parade contingent ti ṭhate leh Bawrhsap Award dawngtute hnenah lawmman a hlan.

MAMIT

Mamitah chuan GSA Playground-ah Republic Day lawm a ni a, bawrhsap K Laltlawmlova'n hnam puanzar a pawh pharh bakah, hnam puanzar chibai buktu parade contingent 13-te chibai buk a chhang let. Bawrhsap chuan, India ram rorelna leh kalphungte hlut a, humhim tur leh tichaktu ni zel turin kal khawmte a sawm.

Mamit DC hian Republic Day puala buatsaih MOC Beautification Project a hawng a; Mamit District Hospital, District Jail leh Mamit khawpuia home hrang hrang - Buannel, Joshua's Children Home, Mamit Observation leh Shakti Sadan te tlawhin thilpek a hlan a ni.

SAITUAL

Keifang Centenary Sports Complex-ah Republic Day lawm a ni a; district bawrhsap Dr Lalngura Tlau-in hnam puanzar pawt pharhin, parade contingent 15-te chibai buk a chhang let.

Dr Lalngura Tlau chuan, India Danpuiin khua leh tui zawng zawngte tan dikna, zalenna, intluktlanna leh inunauna a pek bakah, ei leh bar intodelhna leh mipa leh hmeichhe intluktlanna thlengin kawng a hawn thu a sawi. DC hian parade contingent ti ṭhate hnenah lawmman a sem a, chawimawina eng emaw zat a hlan bawk.

KHAWZAWL

Khawzawlah chuan Mualvawm Field-ah Republic Day lawm a ni a; bawrhsap K Vanlalṭhiana'n hnam puanzar a pawt pharh a, parade contingent 15-te'n hnam puanzar chibai an bûk a chhang let.

K Vanlalṭhiana chuan, ram Danpuiin khua leh tuite hnena zalenna leh intluktlanna a pek chu vawng him a, inlungrual a, indâwm kâng tawn tur leh, ram nuam leh changkanga siam turin kal khawmte a sawm. DC hian IIHR Innovative Farmer Award 2025 dawngtu C Lalchawimawia hnenah chawimawina a hlan a, parade contingent ti ṭhate hnenah lawmman a sem bawk.

HNAHTHIAL

HDSC/HDFA Turf Ground-ah Republic Day lawm a ni a; district bawrhsap K Vanlalruati'n hnam puanzar a pawh pharh a, hnam puanzar chibai bûktu parade contingent 10-te a chhang let.

K Vanlalruati chuan, India rama hnam hrang hrang leh ze hrang hrangte lungrual taka an awm khawm theih chhan chu Danpui a nih thu a sawi. Bawrhsap hian parade contingent ti ṭhate leh lui dung nungchate leh sangha inthlah pun hun chhunga man khapna, closed season humhalhnaa YMA branch ti ṭhate hnenah lawmman a hlan a ni.

HIGH COURT

Gauhati High Court, Aizawl Bench-ah pawh Republic Day lawm a ni a, Gauhati High Court judge Justice Nelson Sailo-in hnam puanzar a pawt pharh a, 225 Battalion CRPF-te'n hnam puanzar chibai an bûk a chhang let.

High Court-a Republic Day lawmnaah hian High Court judge Justice Mitali Thakuria, registrar Dr HTC Lalrinchhana, Aizawl district & session judge Helen Dawngliani, Aizawl District Court-a judge te, Law & Judicial department hotu te, ukil te, Mizoram Bar Association hruaitu te, Mizoram State Legal Services Authority hotute leh sorkar ukilte an tel a ni.