ePoS leh digital weighing scale retailer tinah thlun zawm tura hmalak mek a ni

Food, Civil Supplies and Consumers Affairs (FCSCA) department chuan thuchhuah siamin, bûk dik zawka ration buhfai lak theihna tura sorkar laipuiin retailer tina ePoS leh digital weighing scale-te thlun zawm tura a tih chu January 2026 aṭangin Mizorama retailer tinah thlun zawm tura hmalak a nih thu an tarlang a; January-ah ration sem a khaihlak deuh a nih pawhin, hrethiam turin mipui an ngen.

FCSCA chuan, kum 2022 aṭanga retailer-a ePoS leh digital weighing scale hmante chu Ministry of Consumer Affairs, Food and Public Distribution hnuaia Department of Food & Public Distribution-in thlun zawm (integrate) vek turin thu a lo chhuah tawh tih an tarlang a, "Khawl pahnihte hi thlun zawm a nih chuan internet ṭhat lohna/awm lohna hmuna kutzungṭang thla (fingerprint) hmet kher loa ration lak theih dan (partial offline mode)-a ration sem ṭhin hi a theih tawh dawn loh a ni," an ti.

Kum 2022 khan Mizoramah internet ṭhat lohna/awm lohna retailer hmun 356 a la awm avangin Mizoramah chuan khawl pahnih thlun zawm hi kalpui a ni tih lo an tarlang a ni.

Tun hnaiah sorkar laipuiin thuchhuah thar a siam tih tarlangin FCSCA chuan, "Khawl pahnih thlun zawm hna a rang thei ang bera zo turin thu a pêk mai bakah, an hmalakna leh thlen chinte report thehlut turin state sorkar zawng zawngte a hriattir. Mizoramah pawh internet awm miah lohna khua a awm tâk mang loh avangin January 2026 aṭang chuan khawl pahnih thun zawm a kalpui ve a ni," an ti.

FCSCA chuan, ePoS device hman tirh lamah ration semah harsatna neuh neuh a awm tawh ṭhin tih tarlangin, "Heng harsatnaa ngaih thil tharte hi hun a lo reiin ngaia neih ve leh mai ṭhin a ni tawh angin, ePoS leh DWS thlun zawm pawh hian mipuite tana ration bûk dik zawk lak theihna tur a nih angin tun January 2026-a ration sem a lo khaihlak deuh a nih pawhin mipuite leh retailer-te ṭawiawmna kan ngen e," tiin an tarlang a ni.