Mizoramah jail táng 1,708 an awm; Jail-a leng tura bituk aia tam an tâng

Mizoram chhunga jail hrang hrangah nimin thleng khan táng 1,708 an awm a, jail-a leng tura bituk aiin 505-in an tam zawk.

Mizoramah jail 11 a awm mek a, jail ṭhenkhatah chuan jail-a leng tura bituk aia tam daih an tàn laiin, ṭhenkhatah chuan jail-a leng tura bituk aia tlem daih an táng. Saitual District Jail-ah táng dah a la ni lo.

Jail táng zingah hian 56 chu dam chhung táng tura an chhungthu rêl a ni a, an vaiin mipa an ni. Jail táng zinga mi 1,508 chu mipa an ni a, mi 184 chu hmeichhia an ni. Nute tàn vanga jail-a awm ve naupang 16 an awm bawk.

Jail táng zinga mi 531 chu thiam loh chantir tawh an ni a, mi 1,105 chu an chungthu ngaihtuah lai mek an ni.

Mizorama jail lian ber leh táng tamna ber Central Jail, Aizawlah chuan táng mi 857 an awm a, chutih laiin, jail-a leng tura bituk zat chu 480 a ni. Táng tlemna ber Siaha District Jail-ah mi 52 an táng a, táng thei zat tura bituk chu 92 a ni.