Lalbiakthanga leh C Kamlova'n Padma Shree an dawng dawn

February 25, Inrinni khan Ministry of Home Affairs chuan India ram chawimawina sang dawng tur hrang hrangte a puang a, Mizo zingah Lalbiakthanga Pachuau, Chanmari Veng, Aizawl leh C Kamlova, Mualpui Tlang (Salem Veng), Aizawlte'n Padma Shree an dawng dawn.

Lalbiakthanga Pachuau hian literature, education-journalism huangah a dawng dawn a, C Kam­lova chuan literature leh education huangah a dawng thung ang.  Lalbiakthanga Pachuau hi British India Army-ah a ṭang ṭhin a, sipai a ṭan chhungin award engemawzat a dawng. Sipai aṭanga a chawlh hnu kum 1953 aṭang hian nitin chhuak chanchinbu Zoram Thupuan a din a, MJA pre­si­dent ṭum thum a ni tawh.

Mizoram sorkar leh MJA ṭangkawp chuan Lalbiakthanga Pachuau hi kum 2018 khan 'India’s oldest working journalist' atan a puang a, tunah hian Zoram Thupuan editor a la ni mek a ni. Association for Voluntary Blood Donation (AVDB) dintute zingah pawh telin, general secretary leh president nihnate a chelh ṭhin. C Kamlova hi a naupanlai aṭangin a pa sipai hnathawhna lam Aru­nachal Pradesh lamah a kal ve a ni. A pa  pen­sion hnu hian sipai hmun hrang hrangah lane boy-te niin sipai bel leh pheikhawk nawtte in a inchawm ve a, sports a theih avangin kum a tlin hmain sipaiah a lut a ni.

Kum 1972 khan sipai aṭangin a bang a, Mizo­rama a rawn let hnuah lehkha a zir zawm a, Hindi  MA, M.Ed thleng a zo leh a, middle school leh high school hrang hrangahte a thawh hnuin kum 2008 khan  RB Mahavidyalay principal a nih laiin a pension a ni. India ramah Hindi ṭawng thiam a pawimawh zia hria in a hun tam zawk chu Mizo zirlaiten Hindi ṭawng an thiam ve theih nan theihtawp a chhuah a, sorkar laipuite pawh a dawr ṭhin. Hindi lama a hmalakna avang hian chawimawina eng­emawzat a dawng tawh.