CM-in Mizoram CSR Connect a hawng

Chief minister Lalduhoma chuan nimin khan Aijal Club-ah corporate social responsibility (CSR) diltu leh a petute inthlun zawmna tur 'Mizoram CSR Connect' a hawng. CM chuan, company-ten Mizorama an CSR aṭanga pawisa an rawn sènte chu langtlang, awmze nei leh hlâwk taka hman a nih dawn thu a sawi.

CM Lalduhoma chuan, Mizoram CSR Connect chuan CSR diltute tan awlsamna tam tak a thlen an beisei thu leh, a petute tan pawha langtlang taka CSR kalpui a nihzia hriatna a nih dawn thu a sawi a, "CSR nei company leh an hnuaia civil society-te chu Mizorama an CSR rawn hmang chhuak turin ka sawm a, an pawisa rawn sèn ral tinrengte hi langtlang, awmze nei leh hlâwk taka hman a ni dawn tih kan tiam a ni," a ti.

Kum 2023-24 CSR data-a a lan danin, Mizoram chuan India rama CSR hman chhuah zawng zawngah 0.06% chauh a hmu tih sawiin Lalduhoma chuan, "CSR hmangin hmasawnna hna lian leh ṭangkai tak tak a thawh theih avangin June 2024 khan Chief Minister Office-ah CSR Cell kan din a, an hmalakna zarah a petute leh a diltute inzawnna Mizoram CSR Connect kan hawng thei ta a ni," a ti a; Mizoram chu state ralmuang a nih avangin corporate-te tan CSR hmanga luan chhuahna hmun ṭha leh hmalakna tur remchang tamna a nih thu a sawi.

UNDP India resident representative Angela Lusigi pawhin thu sawiin, UNDP-in India ramah hmalakna tam tak an neih thu a sawi a, "Kan ngaih pawimawh chu khuarei daih hmasawnna (sustainable development) te, hmeichhiate chawikanna te, nungcha leh ramngaw venhimna lamte an ni," a ti.

Angela Lusigi chuan, Mizoramin hmalakna ṭha tak tak a neih avanga an lawm thu sawiin, "Mizoram nena thawkho zel turin kan inpeih reng a, hmalakna hlawhtling kan neih theih nan data dika innghat ruahmanna neih a ṭul," a ti a; CSR hmanga hmalaknate a hlawhtlin theih nan data dik behchhana ruahmanna siam leh kalpui a pawimawh thu a sawi bawk.

Mizoram CSR Connect hi Mizoram CSR Cell, Planning & Programme Implementation department leh UNDP India ten an siam a ni a; a hawnnaah hian Mizoram CSR Cell chairman TBC Lalvenchhunga, adviser to CM, Planning secretary Lalmalsawma Pachuau leh additional secretary Dr Lalrinchhana te pawhin thu an sawi.

Inkhawmah hian India ram hmun hrang hrang aṭangin CSR pe thei corporate aiawhte leh CSR dil thei pawl (agency) aiawhte an tel a; Mizoram Start-Up Mission leh corporate/institution pahnihten an inremna (MoU) lehkha an inhlan nghal bawk.