KHAWTHLIR

Bank account hawng turin chah

Mizoram sorkar chuan Handholding scheme hnuaia loan dil emaw, CM Special Package dil emaw, sorkarin thlai thar a lei tur bik hralh tur neite chu Bána Kaih Scheme hnuaia sorkarin a thawhpui bank panga - SBI, MRB, MCAB, IDBI leh UBI zinga a khawi emaw berah account hawng turin a chah.

END leh CYMA-in Heroin an man

Excise & Narcotics department leh CYMA hnuaia Central Anti Drugs Squad (CADS) chuan January 26, Thawhṭanni chawhnu dar 2:15 khan Zemabawk daiah SML truck aṭangin heroin gram 193 an man. Heroin neitua puh Lallianmawia (37), Champhai Kanan Veng nia inchhál, Vanbiakhnemi (49), Champhai Kanan Veng nia inchhal leh, Zarzoliana (31), Ṭhuampui Camp Venga khawsa nia inchhalte an man bawk.

Lunglei Ni lawm dawn

Lunglei Municipal Council (LMC) ruahmannaa Lunglei Ni hman dan tur ngaihtuahtu Organising Committee chu nimin khan an chairman Lalhmansanga, LMC chief executive officer hoin an ṭhu. Lunglei Ni hi C Ṭhuamluaia Mualah March 4, 2026 khian hman a ni dawn a; LMC huam chhunga YMA branch hrang hrang telna Zaipawlpui din an rel a, khuallian atan Chief Minister sawm ni se, an rêl bawk.

Tui pek sawiho

Serchhip District Water & Sanitation Mission chu an chairman Paul L Khuma, DC hoin nimin khan DC Meeting Hall-ah an ṭhukhawm. Serchhip district-a khaw tam zawkah tui hnianghnara pek theih a nih tawh laiin, khaw ṭhenkhatah harsatna a la awm thu tarlan a ni a, harsatnate chinfel dan tur sawiho a ni. Jal Seva Aankalan (JSA) hnuaiah VC-te chu an khuaa tui lakna dinhmunte enfiah a, eGram Swaraj portal-ah thun vek tura tih an ni a; Serchhip district-a khaw 23-te'n JSM an tihfel tawh thu leh, portal lam fel loh avanga la tih fel theih loh khaw pasarih a la awm thu an tarlang.