Infiamnaa hlawhtlingte Minister-in lawmpui

Sports & Youth Services (SYS) minister Lalnghinglova Hmar chuan nimin khan a pisaah tun hnaia India ram pum huap infiamnaa medal late lawmpuina hun a buatsaih. Minister chuan, infiamnaa hmasawn turin coach ṭha leh infrastructure ṭha neih a pawimawh rualin, a pawimawh ber chu infiammi an nih thu a sawi.

Lawmpuinaah hian October 31 - November 1, 2025 chhunga Bhopal, Madhya Pradesh-a neih 34th All India GV Mavlankar Shooting Championship-a 25m Centre Fire Pistol (Sr. Master Men Category)-a gold medal latu Lallianmawia, November 16-20, 2025 chhunga Hyderabad-a National Sub-Junior Judo Championship (kg 57 category)-a silver medal dawngtu Vanlalramdinpuii leh, November-December 2025 chhunga Indore leh Ranchi-a UTT National Ranking Table Tennis Championships neiha bronze medal dawngtu Jeho Hlimnakulhpuingheta te hnenah lawmpuina hlan a ni.

Lalnghinglova Hmar chuan, ram pum huap infiamna/inelnaa hlawhtlingte leh medal latute a lawmpui thu a sawi a, "Hmasawnna hi engtin nge kan neih ang tih hi kan ngaihtuah fo a ṭul. Hmasawn tur hian coach ṭha, infrastructure ṭha neih a pawimawh a, a pawimawh ber erawh chu a mihringa a ni. Mahni kan pawimawh ber a, hmunhma leh hmanraw lamah state dangte kan tluk pha chiah lo a nih pawhin keimahni’n kan zir phawt chuan ram huap inelnaah kan hlawhtling thei tih a chiang," a ti.

Mizoram sorkarin hmathlir thui tak nei chungin infiamna a kalpui tih sawiin Minister chuan, "India ramin kum 2036-ah Olympic Games thlen ngei tumin ngawrh takin hma a la mek a, Mizoramah Vision 2036 kan kalpui. India-in Olympic thleng thei ila, India aiawhtu zingah Mizote kan tel ve lo ang tih hi a hlauhawm. Hei vang hian kum 2036 thlirlawk hian hma kan la zel a, Mizo infiammi a tam thei ang ber tel ngei tumin theihtawp chhuah a ngai a ni," a ti a; medal lak beisei sàn deuhna tur infiamna an thlûr bing dawn thu a sawi.

Lawmpuina inkhawm hi Mizoram State Sports Council secretary Henry C Lalrawnkima'n a kaihruai a; infiammi hlawhtlingte chhungte bakah sport association hruaitute leh coach-te an tel a ni.