Hnahthial dist MJA-in inkhawmpui hmang

Mizoram Journalists' Association (MJA), Hnahthial district chuan nimin khan Hnahthial Information & Public Relations pisaah Annual Conference an hmang a, Hnahthial IPRO F Lalrinfela'n a hmanpui.

F Lalrinfela chuan, journalism chu democracy hnukpui pawimawh zinga pakhat a nih thu a sawi a, "Demoracy hi dawhkan ke pali ang deuh a ni a, pakhat a tliah chuan a ding thei lo ang deuhin, journalism pawh hi a chhiat chuan mipuite rorelna khawvel hi a chhe ve dawn tihna a ni," a ti a; chanchinbumite chu chhantu leh ngaihsaktu nei lo mipuite aw an nih avangin ram leh khawtlang rawngbawlna pawimawh an ni tih hriaa theihtawp chhuah zel turin a sáwm.

Journalist hlawhtling leh ngaihsanawm ni turin taimak a pawimawh tih sawiin IPRO chuan, "Kan thuchhuah reng reng hi kan rin aiin a thleng thui thei a, mi rilru sûkthlêk thui takin a kaihruai thei. Chuvang chuan fimkhurna kan vawn tlat a pawimawh hle a ni," a ti.

Annual Conference-ah hian kum 2026-2028 chhunga MJA Hnahthial district hruaitu turte thlan a ni a; president atan Hnahthial Today editor C Lalbuatsaiha, vice president atan Calathea editor F Zosangliana leh treasurer atan Kailawn editor VL Liansanga te thlan an ni.