CM leh UNDP palai an inkâwm

Chief minister Lalduhoma chuan nimin khan a pisaah India rama United Nations Development Programme (UNDP) palai (resident representative) Angela Lusigi a kâwm a; Mizoramin India gross domestic product (GDP)-ah 1% tal a thawh ve theih nan ruahmanna a neih thu a sawi.

CM Lalduhoma chuan, kum 2047-a Mizoramin India GDP-ah 1% tal a thawh chhuah ve theih nan ruahmanna an kalpui thu sawiin, chu chu a hlawhtlin theih nan Mizorama UNDP hmalaknate tilian a, tizau zel turin Angela Lusigi a ngen a ni.

Mizorama UNDP hmalaknate avanga a lawm thu sawiin Lalduhoma chuan, NITI Aayog Sustainable Development Index report thar berah Mizorama district pathum chu top 10-a an lan thu a sawi a; Mizoram chu ram ralmuang leh eirukna tlemna a nih thu a sawi bawk.

Angela Lusigi chuan, Mizoram nuam a tih thu sawiin, tun hnaia Mizoramin hmasawnna duhawm tak tak a neihte chu a hriat ṭhin thu a sawi a; UNDP hmalakna leh an ngaih pawimawh zualte a sawi bakah, state sorkar ngaih pawimawh hmasakte Chief Minister a zawt a ni.

Chief Minister hi adviser to CM TBC Lal-venchhunga, CM secretary Vanlaldina Fanai, Planning secretary Lalmalsawma Pachuau leh sorkar hotu dangte'n an ṭawiawm.