MP-in Mizoram chhim tawp thlenga rêl kawng siamna tur sum dah turin a ngen

Rajya Sabha MP K Vanlalvena chuan nimin khan vawiina ṭan tur Parliament budget session inbuatsaihna, All Parliamentary Floor Leaders meeting-ah Sairang rél chawlhhmun aṭanga Mizoram chhim tawp, Myanmar ramri thlenga rel kawng siamna tur sum kumin Union budget-ah dah nghal a ṭul thu a sawi.

K Vanlalvena chuan, Sairang rel chawhmun aṭanga Myanmar ramri thlenga rêl kawng sial tur chu India ram tan leh Mizoram tan a pawimawh dawn thu a sawi a, "Zirchianna hmasa Preliminary Survey zawh a ni tawh a, he rêl kawng sialna tur pawisa hi kumin Union budget-ah hian dah nghal a ṭul a ni," a ti.

Sairang station chu Aizawl aṭanga Lengpui Airport panna kawngpui sira awm a nih avangin kawngpui a lun phah thu sawiin K Vanlalvena chuan, "Tuna kawngpui awm sa Aizawl leh Sairang inkar motor kawng hi a zau tâwk tawh lo a, a rang thei ang bera Sairang station leh Aizawl khawpui inkar hi thlûr li (four lane) kawnga siam a ṭul," a ti a, chumi atan chu 2026-27 Union budget-ah sum dah a ṭul thu a sawi a ni.