Hulhliap SSC thawh sarihna ṭan a ni

Ruihhlo ngaite chhanchhuahna tura buatsaih Hulhliap Short Stay Centre (SSC) batch sarihna chu nimin khan Synod Revival Camping Centre, Sihphir Neihbawihah ṭan a ni.

Hulhliap SSC hi Mizoram sorkar, Mizoram Synod leh tlawmngai pawl ṭhenkhatte'n an buatsaih a ni a; batch 7-na hi mipa, ruihhlo ti ṭhinte tan bika buatsaih niin, nimin tlai lam thleng khan mi 242 an lut. Camp-a lut turte chu Central YMA Hall leh Bawngkawn YMA Hall-ah an kal khawm phawt a, SSC Core Committee member-te'n an buaipui. Thil pawimawhte sawifiah a nih hnuah bus-in Synod Revival Camping Centre panpui an ni.

Tun ṭum SSC-ah hian riuhhlo ngaite Pathian thua enkawltu tur chu Gospel Meichher Team an ni a, speaker chu Laldinthara a ni.

Hulhliap SSC batch hmasa ber chu June 2025 khan ṭan a ni a, batch ruk buatsaih a ni tawh. Batch khat hian ni 20 chhung a awh ṭhin a; a tìr lam ni 10 chhung chu ruihhlo nghei vanga harsatna an tawh loh nan damdawi nen enkawl an ni dawn a, chumi zawh ni nga chhung chu rilru lama mithiamte'n an enkawl ang a, a tawp lam ni nga chhungin Pathian thua enkawl leh an ni ang.