Pawisa note tih thih a tha; Inbuatsaihna a tha lo- CM

Pawisa lak luhna sawifiah theih loh black money

Chief minister Lal Thanhawla chuan, Rs. 500 leh Rs. 1,000 note tihthih (demonetization) chu ṭha a tih rualin, mipuiin harsatna an tawh lohna atana inbuatsaihna a ṭha lo niin a sawi. Hetihlai hian, Taxation department chuan pawisa lak luhna sawifiah theih loh chu black money-ah an ngaih thu an chhuah.

CM Lal Thanhawla hian nimin khan Cong-ress Bhavan-ah thu sawiin, demonetization chu thil ṭha tak a nih thu a sawi a, "Sorkar laipuia Congress sorkar lai khan Finance minister Pranab Mukherjee-a'n High Command-ah a pu lut tawh. Mahse, mipuite hrêk loa tluang taka kalpui dan ngaihtuah a, mipui tawrhtir loh dan turah harsa tih a ni. Mipui harsat loh dan tur ngaihtuah zui atan dah a ni a, Congress-in sorkarna a chang zui ta lo a ni," a ti.

Prime minister Narendra Modi fakin Lal Thanhawla chuan, "Narendra Modi hi a felin mi ṭha tak a nih bakah adviser a nei ṭha. Mi thurâwn lak a peih hle. Tuna pawisa note tihthih pawh hi ṭha ka ti a, mahse, mipuiin an tawrh lohna atana an hmalakna hi ṭha ka ti lo. An la inpeih lo lutuk," a ti a; pawisa tihthih chu ṭha mah se, mipuiin harsatna an tawh lohna atana remruatna felfai a awm lo lutuk chu pawi a tih thu a sawi.

Chief Minister chuan, Rs. 500 leh Rs. 1,000 note tihthih ṭha a tih chhan sawiin, "Sum chhep relh tur venna atan leh hai chhuahna atan chuan thil ṭha tak a ni," a ti.

Hetih lai hian, Taxation department chuan hriattirna tichhuakin, pawisa note tihthih a nih hnuah mi ṭhenkhate'n Mizo mipuite leh sumdawng ṭhenkhatte bank account-ah pawisa tam tham tak deposit nan hman an tum tih hriat a nih thu an tarlang a, "Kan bank account-a pawisa rawn dah tum an awm chuan Mizo mipuite leh sumdawngte remti lo turin kan hriattir a ni," tiin, sumdawngte leh mipui fimkhur turin an chah.

Bank account zawng zawngte Income Tax department-in ngun taka an enthlak mek thu sawiin Taxation department chuan, "Pawisa tam tham tak, kan sum lak luh pangngai nena inmil si lo, sawifiah theih lohte chu black money anga ngaih a ni a, bank account neitu chu dan anga hrem theih an ni dawn," an ti.