Health Minister-in BCM pastor zingah HIV/AIDS awareness campaign a nei

Baptist Church of Mizoram (BCM) chuan nimin khan Lungleiah Baptist Pastor Conference an buatsaih a, Health minister Lal Thanzara'n hmanpuiin, HIV/AIDS awareness campaign a nei nghal. Minister chuan, "Kan rama HIV/AIDS pung zel tur hi kohhran hote nen ṭanghoa kan do a ngai a ni," a ti.

Health Minister chuan, "Lal Isua hun lai khan khawvel tiṭawp leh tihrehawmtu pakhat chu phár natna a ni awm e. Tunlai khawvelah chuan HIV/AIDS natna hi kan khawvel tihrehawmtu tak a nih ngei a rinawm. Kan ram zîm tê leh kilkhâwr takah pawh he natna hian bû a khuar nghet ve ta hle," a ti a; Mizoram chu India ramah mihring cheng zat aṭanga HIV hluarna ber pawl a ni tih a sawi. 

Lal Thanzara chuan, AIDS donanaah ṭanho a pawimawh tih sawiin, "HIV chungchanga kan hmalakna hian thlen chin leh tàwp chin a nei tih kan tun dinhmun enin a hriat. Chuvangin, kohhrante'n theihtawpa hma kan lak a ngai ta. Kohhrana kan rawngbawltu pawimawh tak takte'n hma an lak theih chuan hmanraw ṭangkai a nih ka beisei," a ti.