Rs. 10 thîr lem a awm lo - RBI

Reserve Bank of India (RBI) chuan thuchhuah siamin, Rs. 10 thîr (coin) lem a awm anga thu thehdarh a nih thu sawiin, thu dik lo a nih thu a tarlang a, âwih mai lo turin mipuite a chah.

RBI tarlan danin, sorkar laipuiin pawisa thîr a siamte chu RBI kaltlanga pek chhuah a ni a, pawisa thirte chu hriat hran theih nan chhinchhiahna an nei vek a ni. Mipui mamawh phuhru turin pawisa thir hi denomination hrang hranga siam chhuah ṭhin a ni a, theme hrang hrangte (economic, social leh culture) tilâr turin design thar siam chhuah ṭhin a ni.

Pawisa thir chu hun rei tak pek chhuah leh hman (circulate) a nih avangin, a pianhmang (shape leh design) hrang hrangte a rualin hman pawlh a ni ṭhin a; chuvang chuan Rs. 10 thir
ṭhenkhatah hian 'Rupee symbol' a awm laiin, July 2011 hmaa chhuakhoah erawh chuan 'Rupee symbol' a awm lo. An lan danah (design) danglam mah se, Rs. 10 an ni ve ve a, pawisa hman theih (legal tender)-a pawm vek a ni.

Mi ṭhenkhatin thil hre chiang loin, Rs. 10 thîr nâwite chu a lem nia chhálin thu an thehdarh a, dawrkai leh mipui an tichîâi a; pawisa thir dawng duh lote pawh an awm nia thu dawn a ni.