Hawla'n eirûka rinhlelh neite FIR thehlut turin a hriattir

MPCC president Lal Thanhawla chuan, nimin khan Congress Bhavan-ah thu sawiin, amah leh a minister-te eirukna laka fihlim lo ringhlel an awm chuan FIR thehlut mai turin a hriattir.

MNF-te chu eirukna lam sawi uar turin an infuih nia a hriat thu sawiin Lal Thanhawla chuan, "Eirukna lama an rinthu an sawi ṭhin. An duh chuan an rin thu an sawi hmang hian FIR thehlut se, kan va cho tak em. Kan ram hruaitute hi mipuite hian lepsé ṭhin se, kan ram hruaitute tan a ṭha ang," a ti.

MPCC President chuan, Mizoram kawng chhiat chhan chu MNF an nia sawiin, "MNF sum ngainatna vangin kan kawngte a chhia a, contractor-te hnenah 3% an lak kan tuar. Chuti chungin kan kuta a tlak avangin theihtawp kan chhuah a ni," a ti a; national highway-te chu sum duhna vangin state sorkar thuneihnaa laah MNF a puh.

MNF sorkar lai chuan tun ang hunah chuan mipui beidawngin chem tum nen Aizawlah kawng an zawh bakah, sorkar hnathawk an nuar reng tih sawiin Lal Thanhawla chuan, "An term hnihna tawp lamah mipui an beidawng a, an
ṭìnsan a ni," a ti.

Lal Thanhawla chuan, kum 2018-ah an sorkar tur thu sawitu ber MNF President-in dinna tur bial a la nei lo nia sawiin, "Keini chuan kan dinna tur kan hre vek. Sorkarna hi hmuiah a awm lo," a ti a; kum 2018-ah Congress-in sorkarna an siam leh ngei dawn niin a sawi.

Kum 2018 inthlan hunah Aizawl West-I, West-II leh West-III te an lak belh dawn nia sawiin, Lal Thanhawla chuan, "Kan sorkarna tihchak leh zual turin heng bial pathumte hi kan lak belh dawn. Kan MP-te'n kum thar aṭang chuan opposition bial paruk chu pathum ve vea insemin, kum tin an fund aṭangin heng bialah hian cheng vbc. khat tal an hmang dawn a ni," a ti.